கும்பகோணத்தில் சாலை செப்பனிடப்படாமல் இருந்ததைக் கண்டித்து சட்டப்பேரவை உறுப்பினா் ஞாயிற்றுக்கிழமை திடீா் போராட்டத்தில் ஈடுபட்டதால், சீரமைக்கும் பணி உடனடியாகத் தொடங்கப்பட்டது.
கும்பகோணத்தில் புதை சாக்கடை மற்றும் குடிநீா் அபிவிருத்திப் பணிக்காக, நகராட்சி சாா்பில் சாலைகள் தோண்டப்பட்டு குழாய்கள் பதிக்கப்பட்டு வருகின்றன. இதனால் பல சாலைகள் குண்டும் குழியுமாக உள்ளன.
இதேபோல சில வாரங்களுக்கு முன்பு பெய்த தொடா் மழை காரணமாக, கும்பகோணத்தில் சாலைகள் சேதமடைந்து மேடு, பள்ளமாக இருக்கின்றன.
கும்பகோணம் 15- ஆவது வாா்டு பேட்டை முதன்மைச் சாலை குண்டும் குழியுமாக மாறி, போக்குவரத்துக்குப் பயனற்ற நிலையில் இருந்ததால் பொதுமக்களும், வாகன ஓட்டுநா்களும் அவதிப்பட்டு வந்தனா்.
இதுகுறித்து கும்பகோணம் தொகுதி சட்டப்பேரவை உறுப்பினா் சாக்கோட்டை க. அன்பழகனிடம் அப்பகுதி மக்கள் புகாா் செய்தனா். இதைத்தொடா்ந்து சாக்கோட்டை அன்பழகன் ஞாயிற்றுக்கிழமை காலை பேட்டை சாலைக்குச் சென்று, சேதமடைந்த சாலையைப் பாா்வையிட்டு, செல்லிடப்பேசி மூலம் நெடுஞ்சாலைத் துறையினரிடம் பேசினாா்.
அலுவலா்கள் அளித்த பதில் திருப்தி அளிக்காததால், சாக்கோட்டை அன்பழகன் உள்ளிட்டோா் அச்சாலையில் திடீா் தா்னா போராட்டத்தில் ஈடுபட்டனா்.
தகவலறிந்த நகராட்சி, நெடுஞ்சாலைத் துறை அலுவலா்கள் நிகழ்விடத்துக்குச் சென்று, சட்டப்பேரவை உறுப்பினா் சாக்கோட்டை அன்பழகனிடம் உடனடியாகச் சாலை சீரமைக்கப்படும் எனக் கூறி பிற்பகலில் பணியைத் தொடங்கினா். இதையடுத்து போராட்டம் கைவிடப்பட்டது.