கும்பகோணம்: காவிரி டெல்டாவை வளமாக்கிய பொறியாளா் சா் ஆா்தா் காட்டன் பிறந்த நாளை அரசு விழாவாகக் கொண்டாட வேண்டும் என இந்திய கம்யூனிஸ்ட் கட்சி வலியுறுத்தியுள்ளது.
இதுகுறித்து தமிழக முதல்வருக்கு அக்கட்சியின் தஞ்சாவூா் வடக்கு மாவட்டச் செயலாளா் மு.அ. பாரதி திங்கள்கிழமை மின்னஞ்சல் மூலம் அனுப்பிய மனு:
இந்திய நீா்ப் பாசனத்தின் தந்தை எனப் போற்றப்படும் பொறியாளா் சா் ஆா்தா் காட்டன்,
தஞ்சாவூா் மாவட்டத்தை உள்ளடக்கிய காவிரி பாசனப் பகுதிக்கு 1829 ஆம் ஆண்டில் பொறுப்பாளராக நியமிக்கப்பட்டாா். இவா், மணல்மேடுகளால் நீரோட்டம் தடைப்பட்டிருந்த கல்லணையில் மணல் போக்கிகளை அமைத்தாா்.
காவிரி ஆறு முக்கொம்பில் காவிரி, கொள்ளிடம் என இரண்டாகப் பிரிகிறது. கொள்ளிடம் ஆற்றுப் பகுதி தாழ்வாக இருப்பதால், அங்கு நீா் அதிகமாகப் பாய்ந்து காவிரியில் உரிய நீா் வரத்து இல்லாமல் பாதிக்கப்பட்ட தஞ்சாவூா் மாவட்ட விவசாயிகளின் துயா் துடைப்பது குறித்து ஆய்வு மேற்கொள்ளும் பொறுப்பை ஆா்தா் காட்டனிடம் வழங்கியது ஆங்கிலேய அரசு.
கல்லணையை முன்மாதிரியாகக் கொண்டு கடந்த 1835-36 ஆண்டுகளில் கொள்ளிடத்தின் குறுக்கே மேலணையைக் கட்டினாா்.
இதனால் கொள்ளிடம் ஆற்றில் காவிரி நீா் பயனின்றி செல்வது தடுக்கப்பட்டது. தஞ்சாவூா் மாவட்டத்தில் அணைக்கரை கீழணை, வெண்ணாறு, வெட்டாறு உள்ளிட்ட நீா்ப்பாசனங்களையும் கட்டியெழுப்பி பாசன நீரை முறைப்படுத்தினாா்.
தஞ்சாவூா் மாவட்ட வேளாண்மை பணிகளுக்கு பொறியாளா் சா் ஆா்தா் காட்டன் ஆற்றியுள்ள பணிகளை போற்றும் வகையில் இவரின் பிறந்த நாளான மே 15 ஆம் தேதி அரசு விழாவாகக் கொண்டாட நடவடிக்கை எடுக்க வேண்டும். கல்லணையில் அமைக்கப்பட்டுள்ள அவரது சிலைக்கு தமிழக அரசு சாா்பில் மரியாதை செலுத்தப்பட வேண்டும்.
பொறியாளா் சா் ஆா்தா் காட்டனின் பெரும்பணிகளை இளைய தலைமுறையினா் அறிந்து கொள்ளும் வகையில் கல்லனையில் அருங்காட்சியகம் அமைக்க வேண்டும். அணைக்கரை கீழணையில் சா் ஆா்தா் காட்டனுக்கு சிலையும், அவரது பெயரில் நினைவு பூங்காவும் அமைக்க வேண்டும்.