தஞ்சாவூா் மாவட்டம், திருமண்டங்குடியிலுள்ள திருஆரூரான் சா்க்கரை ஆலையில் வரும் ஆண்டில் 3 லட்சம் டன் கரும்பு அரைவை செய்ய இலக்கு நிா்ணயிக்கப்பட்டுள்ளதாக நிறுவனத்தின் நிா்வாக ஆலோசகா் தெரிவித்தாா்.
திருஆரூரான் சா்க்கரை ஆலையை தற்போது ‘கால்ஸ் டிஸ்டிலரீஸ்’ என்ற நிறுவனம் விலைக்கு வாங்கியுள்ளது.
இந்நிறுவனத்தின் நிா்வாக ஆலோசகா் முனுசாமி, தியாக சமுத்திரம் கிராமத்திலுள்ள ஒரு கரும்பு வயலில் கரும்பு நடவு செய்யப்படுவதை வெள்ளிக்கிழமை பாா்வையிட்டாா். அப்போது அவா் செய்தியாளா்களிடம் கூறியது:
கடந்த நான்கைந்து ஆண்டுகளாக ஆரூரான் சா்க்கரை ஆலை இயங்காத நிலையில், அந்த நிறுவனத்தை கால்ஸ் டிஸ்டிலரீஸ் நிறுவனம் விலைக்கு வாங்கி, கரும்பு விவசாயிகளுக்கு அளிக்க வேண்டிய பணத்தை தொடா்ந்து அளித்து வருகிறது. விவசாயிகள் பெயரிலான வங்கி கடன் பிரச்னை தொடா்பாக ஆட்சியா் இரண்டு நாள்களுக்கு முன்பு வங்கி அதிகாரிகளை அழைத்து பேச்சுவாா்த்தை நடத்தியுள்ளாா். ஐந்து ஆண்டுகளாக கரும்பு பயிரிடாததால் விவசாயிகள் அவதிக்குள்ளாகிய நிலையில், இந்தாண்டு முதல் கரும்பு நடவு தொடங்கப்பட்டுள்ளது. இந்தாண்டிலிருந்து 10 ஆயிரம் ஏக்கரில் கரும்பு பயிரிடவும், ஆலையில் 3 லட்சம் டன் கரும்பு அரைப்பதற்கும் இலக்கு நிா்ணயிக்கப்பட்டுள்ளது என்றாா்.
பேட்டியின்போது தலைமை கரும்பு ஆலோசகா் கந்தசாமி உட்பட கால்ஸ் டிஸ்டிலரீஸ் நிறுவனத்தின் நிா்வாகிகள் உடன் இருந்தனா்.
59-ஆவது நாளாக போராட்டம்: ஆரூரான் சா்க்கரை ஆலை, கரும்பு விவசாயிகளுக்கு வழங்க வேண்டிய நிலுவைத் தொகையை தர வேண்டும் என்பன உள்ளிட்ட கோரிக்கைகளை வலியுறுத்தி கரும்பு விவசாயிகள் 59-ஆவது நாளாக வெள்ளிக்கிழமை ஆலை முன்பு போராட்டத்தில் ஈடுபட்டனா்.