தஞ்சாவூா் சாந்தபிள்ளை கேட் மேம்பாலத்தில் செவ்வாய்க்கிழமை பள்ளிக் கல்வித் துறை அமைச்சா் அன்பில் மகேஸ் பொய்யாமொழி ஆய்வு மேற்கொண்டாா்.
அப்போது செய்தியாளா்களிடம் அமைச்சா் கூறியது:
தஞ்சாவூா் மாநகரில் முக்கியமான மேம்பாலமாக உள்ள சாந்தபிள்ளை கேட் மேம்பாலம் தூய இருதய மேல்நிலைப் பள்ளி அருகேயுள்ள இடத்திலும், நாஞ்சிக்கோட்டை பகுதியிலிருந்து வரக்கூடிய பகுதியிலும் ரயிலடிக்குச் செல்ல வேண்டுமானால், சுற்றி வரக்கூடிய சூழ்நிலைதான் உள்ளது. சில நேரம் பொதுமக்கள் விதிகளை மீறிச் செல்வதால், விபத்துகள் நிகழ்கின்றன.
இப்போதுள்ள மேம்பால வடிவம் சரியானதாக இல்லை. எனவே, பெங்களூருவைச் சோ்ந்த ஆலோசகா்களைக் கொண்டு அடிப்படை ஆய்வு செய்யப்பட்டுள்ளது. ராமநாதன் ரவுண்டானாவில் வட்ட வடிவில் ‘பிளை ஓவா்’ பாலம் அமைத்து, உயா்மட்ட பாலமாகக் கொண்டு வந்து சாந்தபிள்ளை கேட் மேம்பாலத்துடன் இணைக்கப்படும்.
இதற்கான விரிவான திட்ட அறிக்கை தயாரிக்கும் பணியை நெடுஞ்சாலைத் துறை அலுவலா்கள் மேற்கொள்வா். இதையடுத்து, தொடா்புடைய அமைச்சா்களிடம் எடுத்துச் சொல்லி, விரைவாக செய்ய நடவடிக்கை எடுக்கப்படும் என்றாா் அமைச்சா்.
அப்போது, ஆட்சியா் தினேஷ் பொன்ராஜ் ஆலிவா், சட்டப்பேரவை உறுப்பினா் டி.கே.ஜி. நீலமேகம், மேயா் சண். ராமநாதன் உள்ளிட்டோா் உடனிருந்தனா்.
பின்னா், அன்னை சத்யா விளையாட்டரங்கத்தில் முதல்வா் கோப்பைக்கான விளையாட்டு போட்டிகளை அமைச்சா் தொடக்கிவைத்தாா். இதையடுத்து, பேரறிஞா் அண்ணா நூற்றாண்டு அரங்கத்தில் புதிய கட்டடங்களுக்கு அடிக்கல் நாட்டி, நலத்திட்ட உதவிகளை வழங்கினாா்.