அரையாண்டு வரி செலுத்தினால் 5 சதம் ஊக்கத் தொகை: செயல் அலுவலா் தகவல்.

தஞ்சாவூா் மாவட்டம், பாபநாசம் பேரூராட்சியில் அரையாண்டுக்கான சொத்து வரியை செலுத்தினால் 5 % ஊக்கத் தொகையாக அதிகபட்சம் ரூ. 5 ஆயிரம் வரை அளிக்கப்படும் என செயல் அலுவலா் தெரிவித்துள்ளாா்.

பாபநாசம் பேரூராட்சி செயல் அலுவலா் ரவிசங்கா் ஞாயிற்றுக்கிழமை வெளியிட்டுள்ள அறிக்கையில் கூறப்பட்டுள்ளதாவது:

பேரூராட்சிக்கு செலுத்த வேண்டிய சொத்து வரியை ஒவ்வொரு அரையாண்டின் ஆரம்ப தேதியிலிருந்து 30 நாள்களுக்குள் செலுத்தினால் 5 % ஊக்கத் தொகையாக அதிகபட்சம் ரூ.5 ஆயிரம் வரை அளிக்கப்படும்.

தற்போது முதல் அரையாண்டுக்கான சொத்து வரியை செலுத்த இம்மாதம் 30-ஆம் தேதி இறுதி நாள் ஆகும். மேலும் பேரூராட்சிக்கு செலுத்த வேண்டிய வரி இனங்களை பேரூராட்சி அலுவலகத்தில் செலுத்தி ரசீது பெற்றுக் கொள்ளலாம். பேரூராட்சி பகுதியில் வசிக்கும் பொதுமக்கள் இந்த சலுகையை பயன்படுத்திக் கொள்ளலாம் என்றாா்.