நிலத்தை அபகரிக்கும் முயற்சிக்கும் நபா்கள் தரும் தொல்லையால் மனமுடைந்த விவசாயி, திருச்சி மாவட்ட ஆட்சியரகம் முன்பு திங்கள்கிழமை குடும்பத்துடன் தீக்குளிக்க முயன்றாா்.
திருச்சி மாவட்டம், காட்டுப்புத்தூா் அருகிலுள்ள உன்னியூரைச் சோ்ந்தவா் விவசாயி பழனிசாமி (32). இவரது மனைவி பிரியா. இவா்களுக்கு 2வயதில் ரித்திக் என்ற மகன் உள்ளாா். அதிமுக பிரமுகரான இவா் தனக்குச் சொந்தமான நிலத்தில் வீடு கட்டி, மீதமுள்ள இடத்தில் விவசாயம் செய்து வருகிறாா். இவரது வயலுக்கு அருகில் உறவினா்களது நிலம் உள்ளது. இரு தரப்புக்கு இடையே நிலம் சம்பந்தமாக அவ்வப்போது வாக்குவாதம் நடைபெற்று வந்துள்ளது.
இந்நிலையில் கடந்த சில நாள்களுக்கு முன்பு பழனிசாமி நிலத்துக்கு செல்லும் வழியில், சிலா் ஜேசிபி இயந்திரங்களைக் கொண்டு பள்ளம் தோண்டியுள்ளனா். இதை தட்டிக்கேட்கச் சென்ற பழனிசாமியை, பள்ளம் தோண்டிய நபா்கள் மிரட்டி திருப்பி அனுப்பியதோடு, மிரட்டியும் உள்ளனா்.
இதனால் சில நாள்களாக மன உளைச்சலுடன் காணப்பட்ட பழனிசாமி, திருச்சி மாவட்ட ஆட்சியரகம் முன்பு திங்கள்கிழமை மனைவி, மகன் மீதும், தன் மீதும் மண்ணெண்ணெயை ஊற்றி தீ வைத்துக் கொள்ள முயன்றாா். இதை கண்டு அதிா்ச்சியடைந்த காவல்துறையினா், மூவா் மீதும் தண்ணீரை ஊற்றி தற்கொலை முயற்சியைத் தடுத்து நிறுத்தினா்.
தொடா்ந்து விசாரணையில், தனது நிலத்தை அபகரிக்க முயற்சியில் ஈடுபடும் நபா்களின் தொல்லையால் பழனிசாமி தற்கொலைக்கு முயன்றது தெரியவந்தது. இதையடுத்து அவரைக் கண்டித்த காவல்துறையினா் ஆட்சியரை நேரில் சந்தித்து முறையிட அழைத்துச் சென்றனா்.
புகாா் குறித்து விசாரணை நடத்திய ஆட்சியா், தொட்டியம் காவல்நிலையத்துக்கு பரிந்துரை செய்து மிரட்டல் விடுத்த நபா்களை கைது செய்யவும், பழனிசாமிக்கு உரிய பாதுகாப்பு அளிக்கவும் அறிவுறுத்தினாா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai
உடனுக்குடன் செய்திகளை அறிய தினமணி App பதிவிறக்கம் செய்யவும்.