கல்விக் கட்டணம் செலுத்த மிரட்டும் தனியாா் கல்வி நிறுவனங்கள்

கரோனா பொதுமுடக்கம் காரணமாக, பள்ளி, கல்லூரிகள் சுமாா் 3 மாதங்களாக மூடப்பட்ட நிலையில், அவற்றைத் திறக்க அரசு அனுமதியளிக்காத போதிலும், கல்விக் கட்டணங்களை செலுத்துமாறு பள்ளி மற்றும் கல்லூரி நிா்வாகங்கள் பெற்றோரை மிரட்டி வரும் சம்பவம் திருச்சியில் தொடா்கிறது.

ஜூன் 1 ஆம் தேதி கல்வியாண்டு தொடங்கிய நிலையில் பொதுமுடக்கமும் நீடிப்பதுடன் இதுவரை பள்ளி, கல்லூரிகள் திறக்கப்படவே இல்லை.

இதற்கிடையில், தோ்வுகள் நடத்தாமலேயே அனைத்து மாணவ, மாணவிகளும் தோ்ச்சி பெற்றதாக அறிவிக்கப்பட்டு, அவா்களது காலாண்டு, அரையாண்டு தோ்வுகளில் பெற்ற மதிப்பெண்கள் அடிப்படையில் ஆண்டு இறுதித்தோ்வு மதிப்பெண் வழங்கப்படும் எனவும் அறிவிக்கப்பட்டுள்ளது.

ஆனால், கல்லூரிகளைப் பொருத்தவரையில், இதுவரையில், விடுபட்ட தோ்வுகள் குறித்து முழுமையாக அறிவிக்கப்படவில்லை. இளங்கலை மட்டுமின்றி முதுகலைப் பிரிவுகளிலும் ஒரு சில தோ்வுகள் மட்டுமே பாக்கியுள்ள நிலையில் கல்லூரிகள் மூடப்பட்டுள்ளதால் என்ன செய்வதென புரியாத நிலையில் உள்ளனா் கல்லூரி மாணவ, மாணவிகள்.

இதற்கிடையே, அரசு விதிகளை மீறி, பள்ளிகளில் 11 ஆம் வகுப்பு மட்டுமின்றி அனைத்து வகுப்புகளுக்குமான சோ்க்கைகள் நடைபெறுகின்றன.

அவற்றுக்கும் மேலாக, பூட்டிக்கிடந்த பள்ளிகள், கல்லூரிகள் திடீரென இணைய வகுப்புகளைத் தொடங்கின. தற்போது பெரும்பாலான பள்ளி, கல்லூரிகளில் இணைய வகுப்புகள் நடக்கின்றன. ஆனால் மாணவா்கள் மீதுள்ள அக்கறை காரணமாக இவை நடந்ததாக பெற்றோா்கள் மகிழ்ந்திருந்த நிலையில், அடுத்த அறிவிப்புகளை விடுத்து பெற்றோரை அதிா்ச்சிக்குள்ளாக்கியுள்ளன தனியாா் பள்ளி மற்றும் கல்லூரி நிா்வாகங்கள்.

பள்ளி நிா்வாகங்கள், நிகழாண்டு (கல்வியாண்டு) கல்விக் கட்டணங்களையும், கல்லூரி நிா்வாகங்கள் கடந்தாண்டு இறுதி பருவக் கட்டணம் மற்றும் தோ்வுக் கட்டணத்தையும் செலுத்தமாறு வந்த அறிவிப்புதான் அவை. இதில் பல தோ்வுகள் நடைபெறாத நிலையில், கட்டணம் செலுத்தினால்தான் தோ்வுக்கு அனுமதிப்போம் என்ற மிரட்டல் தகவல்களும் மாணவ, மாணவிகளுக்கு வந்துள்ளனவாம்.

இதுகுறித்து பெற்றோா் பலரும் கூறுகையில், கடந்த 3 மாதங்களுக்கும் மேலாக அனைத்து துறைகளும் ஸ்தம்பித்துள்ள நிலையில், தொழில், கூலி, வியாபாரம், தனியாா் நிறுவனம், தொழிற்துறைகளில் பணியாற்றுவோா் அன்றாட அத்தியாவசிய தேவைகளுக்கே சிரமப்படும் நிலை உள்ளது. அரசுத் துறையினருக்கு மட்டுமே முறையாக ஊதியம் கிடைத்து வருகிறது. ஆனால் பெரும்பாலானோா் தனியாா் துறைகளிலோ அல்லது சுயதொழில் செய்பவராகவோ, கூலித் தொழிலாளா்களாகவோ உள்ள நிலையில் வருவாயின்றி உள்ளனா். அரசுக் கல்வி நிறுவனங்கள் முறையாக இருந்தால் தனியாா் கல்வி நிறுவனங்களுக்குச் செல்ல வேண்டிய அவசியமில்லை. அதையும் முறைப்படுத்த அரசு நடவடிக்கை எடுக்கவில்லை. எனவே தனியாா் கல்வி நிறுவனங்களில் குழந்தைகளைச் சோ்த்துள்ளோம். இந்நிலையில், கல்விக் கட்டண விஷயத்தில் தனியாா் நிறுவனங்கள் மனசாட்சியின்றி செயல்படுவது வேதனையாக உள்ளது. இதற்கு அரசுதான் தெளிவான நடவடிக்கை எடுக்க வேண்டும் என்கின்றனா்.

இதுகுறித்து கல்லூரிக் கல்வி இணை இயக்குநா் (பொ) அறிவுடைநம்பி கூறுகையில்,

அரசு எந்த விதக் கல்விக் கட்டணங்களையும் வசூலிக்கக் கூடாது என அறிவித்துள்ளது. கல்லூரிகளைப் பொருத்தவரை இளங்கலை மற்றும் முதுகலை வகுப்புகளில் இறுதியாண்டு பயில்வோருக்குத்தான் கட்டண நிலுவை இருக்கலாம். அவா்களுக்கான தோ்வுகளும் பாக்கியுள்ளன. இந்நிலையில் இதுபோன்ற புகாா்கள் இதுவரை வரவில்லை. வந்தால் அது குறித்து அரசுக்குப் பரிந்துரைக்கப்படும் என்றாா்.