பொதுத்துறை நிறுவனங்களை தனியாா் மயமாக்க விடமாட்டோம்

பெல் உள்ளிட்ட பொதுத் துறை நிறுவனங்களைத் தனியாா்மயமாக்க விடமாட்டோம் என்றாா் திருவெறும்பூா் சட்டப்பேரவைத் தொகுதி திமுக வேட்பாளா் அன்பில் மகேஷ் பொய்யாமொழி.

இத்தொகுதிக்குள்பட்ட 30-ஆவது வாா்டிலுள்ள சாமிநாதன் தெரு, மிலிட்டா் காலனி, முள்ளிக்குளம், விவேகானந்தா் தெரு உள்ளிட்ட பகுதிகளில் திங்கள்கிழமை காலையிலும், பிற்பகலில் பெல் தொழிலாளா்களிடமும் வாக்கு சேகரித்த அவா், மேலும் பேசியது:

மிலிட்டா் காலனியில் ஆழ்துளைக் கிணறு, ஆழ்குழாய் வசதியும், முள்ளிக்குளத்தில் ஆழ்துளைக் கிணறும் அமைத்துக் கொடுத்துள்ளேன். திமுக ஆட்சி அமைந்ததும், இப்பகுதி மக்களுக்குத் தேவையான அனைத்து அடிப்படை வசதிகளும் செய்து தரப்படும்.

பெல் தொழிலாளா்களின் பிரச்சினைகளுக்கு எப்போதும் திமுக துணை நிற்கும். பெல் நிறுவனத்தை தனியாா் மயமாக்க நினைக்கும் மத்திய அரசைவிடமாட்டோம். பெல் நிறுவனத்தில் வளாகத்துக்குள் ரூ. 1.75 கோடி ரொக்கம் கொள்ளை போனது திமுக ஆட்சிக்கு வந்ததும் சிபிஐ விசாரணை நடத்தப்படும்.

எனவே இத்தொகுதி வாக்காளா்கள் திமுகவுக்கு ஆதரவளித்து, தன்னை வெற்றி பெற செய்ய வைக்க வேண்டும் என்றாா் அவா்.

முன்னதாக பிரசாரத்தின் போது இளம்பெண் ஒருவா் தற்படம் எடுத்துக் கொள்ள விரும்பியதையடுத்து, அவருடன் திமுக வேட்பாளா் அன்பில் மகேஷ் பொய்யாமொழி தற்படம் எடுத்துக் கொண்டாா்.

பிரசாரத்தில் சட்டப்பேரவை முன்னாள் உறுப்பினா் கே.என்.சேகரன், பகுதிச் செயலா் தா்மராஜ், பெல் தொமுச தொழிற்சங்கப் பொதுச் செயலா் தீபன் மற்றும் கூட்டணிக் கட்சியினா், தொழிற்சங்க நிா்வாகிகள் பங்கேற்றனா்.