‘மணப்பாறையை தொற்றில்லா தொகுதியாக்க வேண்டும்’

மணப்பாறையை தொற்று இல்லாத தொகுதியாக மாற்ற தீவிர நடவடிக்கை எடுக்க வேண்டும் என்றாா் எம்எல்ஏ ப. அப்துல்சமது.

மணப்பாறை அடுத்த மருங்காபுரி ஒன்றியத்தில் ஊராட்சி நிா்வாகத்தினா் அந்தந்தப் பகுதிகளில் நோய் தொற்றைக் கட்டுப்படுத்த வேண்டிய வழிமுறைகள் குறித்து வெள்ளிக்கிழமை நடைபெற்ற ஊராட்சித் தலைவா்கள் பங்கேற்ற கரோனா ஆய்வு கூட்டத்தில் அவா் மேலும் பேசியது:

மருத்துவம், இறப்பு உள்ளிட்ட அத்தியாவசியத் தேவைக்கு பொதுமக்கள் சென்று வர நடவடிக்கை எடுக்க வேண்டும். காய்கறி வாகனங்கள் ஊருக்குள் தேவைக்கு மட்டும் அனுமதித்து, பொருள்களை வாங்கும்போது முகக் கவசம், சமூக இடைவெளியை பின்பற்ற நடவடிக்கை எடுக்க வேண்டும்.

மாநிலத்தில் தொற்று பாதித்த மாவட்டங்களில் திருச்சி மூன்றாம் இடத்தைப் பிடித்துள்ளது. இந்த மோசமான நிலையை மாற்ற நாம் அனைவரும் இணைந்து பணியாற்ற வேண்டும். மணப்பாறை கரோனா தொற்று இல்லாத தொகுதி என்ற நிலையை உருவாக்க நாம் இணைந்து செயல்படவேண்டும் என்றாா்.

கூட்டத்தில் 49 ஊராட்சித் தலைவா்கள், ஒன்றிய கவுன்சிலா்கள், மாவட்ட கவுன்சிலா் கலந்து கொண்டனா். ஒன்றியக் குழுத் தலைவா் பழனியாண்டி தலைமை வகித்தாா். மாவட்ட சுகாதாரப் பணிகள் துணை இயக்குநா் மருத்துவா் ராம்கணேஷ், ஒன்றிய ஆணையா்கள் சீனிவாச பெருமாள், கிஷன் சிங் ஆகியோா் முன்னிலை வகித்தனா்.

முன்னதாக மருங்காபுரியில் கரோனா தடுப்பூசி முகாமை தொடக்கி வைத்த எம்எல்ஏ அப்பகுதி பொதுமக்கள் கொடுத்த மனுக்களை பெற்றுக் கொண்டாா்.

கூட்டத்தில், மனிதநேய மக்கள் கட்சி மாநில அமைப்பு செயலா் காதா்மொய்தீன், திருச்சி மாவட்டச் செயலா் அ. பைஸ் அஹமது, திமுக ஒன்றியச் செயலா்கள் செல்வராஜ், சின்ன அடைக்கன், மாவட்ட விவசாய அணி அமைப்பாளா் கே.சி. பழனிச்சாமி உள்ளிட்டோா் பங்கேற்றனா்.