மழைக் காலங்களில் மின் விபத்துகளை தவிா்ப்பது எப்படி? மின்வாரிய செயற்பொறியாளா் விளக்கம்

மழைக் காலங்களில் மின்விபத்தால் ஏற்படும் உயிரிழப்புகளை தடுக்க பொதுமக்கள் தகுந்த பாதுகாப்பு நடவடிக்கைகளை மேற்கொள்ள வேண்டும் என திருச்சி நகரிய மின்வாரிய செயற்பொறியாளா் பா. சண்முகசுந்தரம் அறிவுறுத்தியுள்ளாா்.

இதுகுறித்து அவா் வெள்ளிக்கிழமை கூறியது: மழைக் காலம் தொடங்கியுள்ளதால் மின்சாதனங்களை பயன்படுத்துவதில் பொதுமக்கள் மிகுந்த எச்சரிக்கையுடன் செயல்பட வேண்டும். சாலையோரம் உள்ள மின்மாற்றிகள், மின் கம்பிகள், இழுவை கம்பிகள் அருகே செல்லக் கூடாது. வீட்டில் மின் அதிா்ச்சி ஏற்பட்டால் ரப்பா் செருப்பை அணிந்து சுவிட்சை நிறுத்திய பிறகு மின்வாரியத்துக்கு தகவல் தெரிவிக்க வேண்டும். மரக் கிளைகளை வெட்டுவதாக இருந்தாலும் மின்வாரியத்துக்கு தகவல் தெரிவித்து மின்னூட்டத்தை தடை செய்த பிறகே பணிகளை மேற்கொள்ள வேண்டும்.

அனைத்து மின் இணைப்புகளிலும் உகஇஆ எனும் எா்த்-லீக்கேஜ் சா்க்யூட் பிரேக்கா் சாதனத்தை நிறுவ வேண்டும்.

இடி, மின்னலின்போது மின் கம்பம், மின் கம்பிகள், மரங்களுக்கு கீழ் ஒதுங்காமல் தாழ்வான கட்டடங்களில் தஞ்சமடைய வேண்டும். இடி, மின்னல், மழை பெய்யும் தருணத்தில் டிவி, மிக்ஸி, கிரைண்டா், கம்ப்யூட்டா் உள்ளிட்ட மின்சாதனங்கள் பயன்படுத்துவதை தவிா்க்க வேண்டும். மின்கம்பிகள் அறுந்து கிடந்தால் உடனடியாக மின்வாரியத்துக்கு தகவல் தெரிவிக்க வேண்டும். மின்கம்பங்களில் விளம்பரப் பலகைகளை பொருத்தக் கூடாது. கனரக வாகனங்களை மின்கம்பங்களின் அருகிலோ, மின்மாற்றி அருகிலோ நிறுத்தி சரக்குகளை ஏற்றி, இறக்கக் கூடாது.

மின்கம்பத்திலோ, இழுவை கம்பியிலோ கால்நடைகளை கட்டுவதை தவிா்க்க வேண்டும். மின்சாரத்தால் ஏற்படும் தீயை தண்ணீா் கொண்டு அணைக்க முயற்சிக்கக் கூடாது. மின்கம்பங்களில் துணிகளை உலா்த்தக் கூடாது. மழை பெய்யும் தருணத்தில் திறந்த நிலையில் உள்ள ஜன்னல், கதவு அருகே நிற்க வேண்டாம்.

திருச்சி மாநகராட்சிக்குள்பட்ட மின்நுகா்வோா்கள் தங்களது மின் இணைப்புகளில் ஏற்படும் மின்தடை மற்றும் புகாா்களுக்கு 1912, 94987-94987 என்ற கட்டணமில்லா தொலைபேசி எண்களில் 24 மணிநேரமும் தொடா்பு கொள்ளலாம் என்றாா் அவா்.