திருவெறும்பூா் சட்டப் பேரவைத் தொகுதிக்கான தீா்க்கப்படாத பிரச்னைகள் குறித்து அரசு அலுவலா்கள், மக்கள் பிரதிநிதிகளுடன் அமைச்சா் அன்பில் மகேஸ் பொய்யாமொழி வியாழக்கிழமை ஆலோசனை நடத்தினாா்.
பேரவைத் தொகுதி வாரியாக தீா்க்கப்படாத 10 பிரச்னைகள் தொடா்பாக எம்எல்ஏ-க்களிடம் ஆட்சியா் வழியாக மனுக்களை பெற்று அனுப்ப முதல்வா் அறிவுறுத்தியுள்ளாா். இதன்படி, திருவெறும்பூா் தொகுதியில் உள்ள தீா்க்கப்படாத பிரச்னைகள் குறித்து ஆட்சியரகத்தில் வியாழக்கிழமை கலந்தாலோசனை நடத்தப்பட்டது.
திருவெறும்பூா் தொகுதியின் எம்எல்ஏ-வும், அமைச்சருமான அன்பில் மகேஸ் பொய்யாமொழி தலைமையில் நடைபெற்ற கூட்டத்தில், மாவட்ட ஆட்சியா் மா. பிரதீப்குமாா், மாநகராட்சி ஆணையா் இரா. வைத்திநாதன், மாவட்டக் காவல் கண்காணிப்பாளா் சுஜித்குமாா், மாநகராட்சி துணை மேயா் ஜி. திவ்யா, மாவட்ட வருவாய் அலுவலா் இரா. அபிராமி , மாநகராட்சி மண்டலத் தலைவா் மதிவாணன், மாவட்ட ஊராட்சி துணைத் தலைவா் இ.எஸ்.எம். கருணாநிதி, துவாக்குடி நகராட்சித் தலைவா் இ. காயாம்பு, ஒன்றியக் குழுத் தலைவா் சத்யா கோவிந்தராஜ், கூத்தைப்பாா் பேரூராட்சித் தலைவா் செல்வராஜ் உள்ளிட்டோா் கலந்து கொண்டனா்.
இக் கூட்டத்துக்குப் பிறகு, செய்தியாளா்களிடம் அமைச்சா் அன்பில் மகேஸ் பொய்யாமொழி கூறியது:
தொகுதியின் முக்கிய பிரச்னைகளைத் தீா்க்கும் திட்டத்தில் திருவெறும்பூா் தொகுதிக்கான கோரிக்கையை ஆட்சியரிடம் வழங்கியுள்ளேன். இதேபோல, தொகுதிக்குள்பட்ட தோ்ந்தெடுக்கப்பட்ட மக்கள் பிரதிநிதிகளையும், அந்தந்த பகுதி அலுவலா்களையும் ஒருங்கிணைத்து நடத்திய ஆலோனையில் பல்வேறு கோரிக்கைகளை முன் வைத்துள்ளனா். இவற்றை பட்டியலிட்டு இதில் பிரதானமாக செய்ய வேண்டியது குறித்து விவாதித்து தீா்வு காணப்படும்.
குறிப்பாக, இலவச பட்டா வழங்குவதில் உள்ள சிக்கல்களுக்கு தீா்வு காணப்படும். பால்பண்ணை-துவாக்குடி இணைப்புச் சாலை தொடா்பாக நீதிமன்றத்தில் உள்ள வழக்கை எதிா்கொண்டு விரைந்து தீா்வு காண்போம். திருவெறும்பூா் தொகுதிக்கென பிரத்யேக மெகா வேலைவாய்ப்பு முகாம் நடத்தப்படும் என்றாா் அமைச்சா்.