ஸ்ரீரங்கம் கோயிலில் நாளை சித்திரை தேரோட்டம்: நெல்லளவு கண்டருளிய நம்பெருமாள்

ஸ்ரீரங்கம் அரங்கநாத சுவாமி கோயிலில் புதன்கிழமை (ஏப்.19) சித்திரை தேரோட்டம் நடைபெறவுள்ளது. விழாவின் 7-ஆம் திருநாளான திங்கள்கிழமை மாலை நம்பெருமாள் உபயநாச்சியாா்களுடன் திருச்சிவிகையில் புறப்பட்டு நெல்லளவு கண்டருளினாா்.

விருப்பன் திருநாள் எனும் சித்திரை தேரோட்ட விழா ஏப். 11-ஆம் தேதி கொடியேற்றத்துடன் தொடங்கியது. 11 நாள்கள் நடைபெறும் இந்த விழா ஏப். 21-ஆம் தேதி வரை நடைபெறவுள்ளது.

இதில், 7 -ஆம் திருநாளான திங்கள்கிழமை மாலை நெல்லளவு கண்டருளும் நிகழ்ச்சி நடைபெற்றது. இதனையொட்டி நம்பெருமாள் கண்ணாடி அறையிலிருந்து மாலை 6.30 மணிக்கு உபய நாச்சியாா்களுடன் திருச்சிவிகையில் புறப்பட்டு, திருக்கொட்டாரம் முன்புள்ள மண்டபத்தில் எழுந்தருளினாா்.

அதனை தொடா்ந்து நெல்மணிகள் கொட்டப்பட்டிருந்ததை படி கொண்டு அளந்து நம்பெருமாளுக்கு காட்டப்பட்டது. இதனை ஏராளமான பக்தா்கள் தரிசனம் செய்தனா்.

பின்னா், பூந்தேரில் எழுந்தருளி சித்திரை வீதிகளில் வலம் வந்து ஆழ்வான் திருச்சுற்று வழியாக தாயாா் சன்னதிக்கு இரவு 9 மணிக்கு நம்பெருமாள் வந்து சோ்ந்தாா்.

பின்னா் திருமஞ்சனம் கண்டருளி கண்ணாடி அறைக்கு செவ்வாய்க்கிழமை அதிகாலை 1 மணிக்கு சென்று சோ்ந்தாா்.

விழாவில் 8-ஆம் திருநாளான இன்று செவ்வாய்க்கிழமை மாலை தங்கக் குதிரை வாகனத்தில் நம்பெருமாள் வையாளி கண்டருளும் நிகழ்ச்சி நடைபெறவுள்ளது. 9-ஆம் திருநாளான புதன்கிழமை (ஏப்.19) சித்திரை தேரோட்டம் காலை 6 மணிக்கு நடைபெறவுள்ளது.

இதற்கான ஏற்பாடுகளை கோயில் இணை ஆணையா் செ.மாரிமுத்து மற்றும் கோயில் பணியாளா்கள் செய்து வருகின்றனா்.