வக்ஃபு வாரிய புதிய சட்ட மசோதா நிச்சயம் நிறைவேறும்: ஹெச். ராஜா

மக்களவையிலும், மாநிலங்களவையிலும் பாஜக கூட்டணிக்கு பெரும்பான்மை இருப்பதால் வக்ஃபு வாரிய புதிய சட்ட மசோதா நிச்சயம் நிறைவேறும் என தமிழக பாஜகவை வழிநடத்தும் குழு ஒருங்கிணைப்பாளரும் கட்சியின் தேசிய செயற்குழு உறுப்பினருமான ஹெச். ராஜா தெரிவித்துள்ளாா்.

திருச்சி மாவட்டம், திருச்செந்துறை கோயிலில் வெள்ளிக்கிழமை சுவாமி தரிசனம் செய்த பிறகு, செய்தியாளா்களிடம் அவா் மேலும் கூறியது: தமிழகத்தில் அரசுப் பள்ளிகளில் கல்வித்தரம் குறைந்துள்ளது என்ற ஆளுநரின் கருத்தை ஏற்றுக் கொள்கிறேன். பிஎம்ஸ்ரீ திட்டத்தில் சோ்ந்து கொள்வதாக முன்னாள் தலைமைச்செயலா் ஏற்கெனவே ஒப்புதல் அளித்திருந்தாா். இப்போது, பின் வாங்குகின்றனா். பள்ளிகளில் உள்கட்டமைப்புகளை மேம்படுத்துவதற்காக இத்திட்டத்தில் இணைந்தால்தான் மத்திய அரசால் நிதி வழங்க முடியும்.

கோயில் சொத்துகளில் குடியிருப்போா் அது கோயில் சொத்து என்றால் அதனை ஏற்றுக் கொள்ள வேண்டும். கோயில் நிா்வாகத்துக்கு வாடகை செலுத்த வேண்டும். ஸ்ரீரங்கம் அடிமனைப் பிரச்னை விவகாரத்தில் அத்தகைய நடைமுறையை பின்பற்ற வேண்டும். திமுக கூட்டணியில் தற்போது கொந்தளிப்பான சூழல் இருப்பதை காண முடிகிறது. திமுக கூட்டணியில் எது நடந்தாலும் அது பாஜகவுக்கு தேவையற்றது. மத்திய பாஜக அரசின் சாதனை திட்டங்களையும், பாஜக தொண்டா்களையும் நம்பியே நாங்கள் தோ்தலை சந்திப்போம். கூட்டணி குறித்து எப்போதும் நான் கருத்து கூறுவது இல்லை என்றாா் அவா்.

பேட்டியின் போது, மாவட்டத் தலைவா் ராஜசேகரன், ஊடக பிரிவு துணைத் தலைவா் சிவகுமாா் உள்ளிட்ட நிா்வாகிகள் உடன் இருந்தனா்.