பொருளாதாரத்தில் தமிழகம் முதலிடம் பெற வேண்டும்

நாட்டிலேயே பொருளாதாரத்தில் தமிழகம் முதலிடத்தை அடையப் பாடுபட வேண்டுமென தமிழக பள்ளிக்கல்வித் துறை அமைச்சா் அன்பில் மகேஸ் பொய்யாமொழி தெரிவித்தாா்.

தமிழக துணை முதல்வரும், திமுக இளைஞரணி செயலருமான உதயநிதி ஸ்டாலின் பிறந்தநாளை முன்னிட்டு டிசிஎம் - 48 என்ற தலைப்பில் திருச்சி தெற்கு மாவட்டம் முழுவதும் பல்வேறு நிகழ்ச்சிகள் நடத்தப்படுகின்றன.

இதன் ஒரு பகுதியாக, 24 ஆவது நிகழ்வாக திருச்சி தெற்கு மாவட்ட மற்றும் மாநகர வா்த்தக அணி சாா்பில் சாதனையாளா்களுக்கு விருது வழங்கும் விழா திருச்சி பால்பண்ணையில் புதன்கிழமை நடைபெற்றது.

இதில் அமைச்சா் அன்பில் மகேஸ் பொய்யாமொழி பங்கேற்று பேசுகையில்,

நாட்டிலேயே அதிக இளைஞா்களுக்கு வேலைவாய்ப்பை உருவாக்குவதில் முதலிடம் வகிப்பது தமிழகம்தான் என ரிசா்வ் வங்கியே கூறியுள்ளது. எனவே, நாம் அனைவரும் முதல்வரின் கரத்தை வலுப்படுத்தி, நாட்டிலேயே தமிழகத்தை பொருளாதாரத்தில் முதலிடத்தில் கொண்டு வரப் பாடுபட வேண்டும். தற்போது விருது பெறுபவா்களைப் பாா்த்து இளைய சமுதாயத்தினா் சாதனை புரிய வேண்டும் என்றாா்.

முன்னதாக, விழாவுக்கு மாவட்ட வா்த்தக அணி அமைப்பாளா் செந்தமிழ்ச் செல்வன், மாநகர அமைப்பாளா் கேபிகே. சரவணன் ஆகியோா் தலைமை வகித்தனா். மாவட்ட வா்த்தக அணித் தலைவா் பாலாஜி வரவேற்றாா்.

மாநகர செயலா் மு. மதிவாணன் உள்ளிட்ட பலா் கலந்து கொண்டனா்.