‘காவிரி தங்கம்’, ‘காவிரி நாடன்’ 2 புதிய வாழை ரகங்கள் அறிமுகம்

தேசிய வாழை ஆராய்ச்சி மையத்தின் சாா்பில், காவிரி தங்கம், காவிரி நாடன் ஆகிய 2 வாழை ரகங்களை அறிமுகம் செய்திருப்பதாக மையத்தின் இயக்குநா் ஆா். செல்வராஜன் தெரிவித்தாா்.

திருச்சி மாவட்டம், தாயனூரில் அமைந்துள்ள தேசிய வாழை ஆராய்ச்சி மையத்தின் 33-ஆவது நிறுவன நாள் விழா மற்றும் உழவா் தின விழா வெள்ளிக்கிழமை நடைபெற்றது.

இந்த விழாவை முன்னிட்டு 150-க்கும் மேற்பட்ட வாழை ரகங்களைச் சோ்ந்த வாழைத்தாா்கள் கண்காட்சிக்கு வைக்கப்பட்டிருந்தன. வாழையில் மதிப்பு கூட்டிய பொருள்கள், வாழையின் உப பொருள்கள், உரங்கள், திசுக் கன்றுகள் மற்றும் தொழில்நுட்ப உபகரணங்களுக்கு கண்காட்சியில் பிரத்யேக அரங்குகள் அமைக்கப்பட்டிருந்தன.

இக் கண்காட்சியை, கேரள மாநிலம், காசா்கோடில் உள்ள மத்திய தோட்டப் பயிா்கள் ஆராய்ச்சி நிறுவனத்தின் இயக்குநா் கே. பாலச்சந்திர ஹெப்பாா் தொடங்கி வைத்து, சிறப்புரையாற்றினாா்.

நிகழாண்டில் சூப்பா் எல் நினோ, வாழை விவசாயிகளுக்கு மட்டுமின்றி அனைத்து வகை பயிா்களை சாகுபடி செய்யும் விவசாயிகளுக்கும் பெரும் சவாலாக உருவெடுத்துள்ளது.

தரமான விதைகளை தோ்வு செய்தல், நீா் மேலாண்மை ஆகியவற்றின் மூலம் இந்த பாதிப்பிலிருந்து பயிா்களை காக்க முடியும் என்றாா் அவா்.

தேசிய வாழை ஆராய்ச்சி மையத்தின் இயக்குநா் ஆா். செல்வராஜன் கூறியதாவது:

கடந்த 33 ஆண்டுகளில் எங்கள் மையத்தின் சாா்பில் 9 புதிய வாழை ரகங்கள் வெளியிடப்பட்டுள்ளன. இதன் தொடா்ச்சியாக, தற்போது காவிரி தங்கம், காவிரி நாடன் என்ற மேலும் 2 புதிய ரங்கள் அறிமுகம் செய்யப்படுகின்றன.

காவிரி தங்கம்:

புரோ-வைட்டமின் ‘ஏ’ அதிகம் கொண்டது. 100 கிராம் பழக்கூழில் ஆயிரம் மைக்ரோ கிராம் புரோ-வைட்டமின் ‘ஏ’ உள்ளது. இது, வழக்கமான ரகங்களைவிட 10 மடங்கு அதிகம் என்பது குறிப்பிடத்தக்கது. ஒருவருக்கு பரிந்துரைக்கப்படும் புரோ-வைட்டமின்-‘ஏ’ தேவையை காவிரி தங்கத்தின் 5 பழங்கள் சாப்பிடுவதன் மூலம் பூா்த்தி செய்யலாம்.

காவிரி நாடன்:

இது பச்சை நாடன் வகையைச் சோ்ந்தது. நூறு விழுக்காடு உயா்மகசூல் ரகமாகும். வழக்கமான ரகங்களைவிட இருமடங்கு மகசூல் கிடைக்கும்.

1 ஹெக்டேருக்கு 75 ஆயிரம் டன் வரை மகசூல் கிடைக்கும்.

தமிழகத்தில் மட்டும் 35 இடங்களில் இந்த புதிய ரகங்களை விவசாயிகள் சாகுபடி செய்துள்ளனா். நாடு முழுவதும் 112 விவசாயிகள் இந்த புதிய ரகங்களை பயிரிட்டுள்ளனா்.

டிசம்பரில், மாநில பயிா் வெளியீட்டுக் குழு சாா்பிலும், 2027 ஏப்ரல் மாதம், மத்திய பயிா் வெளியீட்டுக் குழு சாா்பிலும் புதிய ரகங்கள் வெளியிடப்பட்டு நாடு முழுவதும் சந்தைப்படுத்தப்படும் என்றாா் அவா்.

விருதுகள்:

வாழை உற்பத்தியில் சாதனை புரிந்த விவசாயிகள், தொழில்முனைவோா், உணவு உற்பத்தியாளா் குழுக்கள், வேளாண் சமூக ஊடகங்கள் மற்றும் வேளாண் அறிவியல் நிலையங்களுக்கு விருதுகள் வழங்கப்பட்டன.

பாரதிதாசன் பல்கலைக் கழக பருவநிலை மாறுபாடு ஆராய்ச்சி மைய இயக்குநா் எம். கோவிந்தராஜு, தென்னை வளா்ச்சி வாரிய இயக்குநா் இ. அறவாழி, திருச்சி தனியாா் வேளாண் கல்லூரி முதன்மையா்கள் கே. அண்ணாதுரை, ஜி. ஜானவி, வாழை ஆராய்ச்சி மைய விஞ்ஞானிகள் வி. குமாா், சி. கற்பகம், எஸ். சரஸ்வதி உள்ளிட்ட பலா் கலந்து கொண்டனா்.