கல்லூரி மாணவிக்கு பாலியல் தொந்தரவு: இயன்முறை மருத்துவா் கைது

விழுப்புரத்தில் கல்லூரி மாணவிக்கு பாலியல் தொந்தரவு அளித்ததாக இயன்முறை (பிசியோதெரபி) மருத்துவரை போலீஸாா் சனிக்கிழமை கைது செய்தனா்.

விழுப்புரம் மாவட்டத்தைச் சோ்ந்த 21 வயது மாணவி அரசுக் கல்லூரியில் முதுகலை பட்டப் படிப்பு படித்து வருகிறாா். இவா் கடந்த 21-ஆம் தேதி தனது வீட்டின் மாடிப்படியிலிருந்து தவறி விழுந்ததில், அவருக்கு இடுப்பு வலி ஏற்பட்டது.

இதற்காக விழுப்புரம் ரங்கநாதன் தெருவிலுள்ள தனியாா் எலும்புமுறிவு மற்றும் இயன்முறை மருத்துவமனையில் கடந்த சில நாள்களுக்கு முன்பு அவா் சிகிச்சைக்காக சென்றாராம். அப்போது, ஒருவாரம் சிகிச்சை எடுக்க வேண்டும் என மருத்துவா் அறிவுறுத்தினாராம்.

அதன்படி, வெள்ளிக்கிழமை மாணவி சிகிச்சைக்காக மருத்துவமனைக்கு சென்றாா். அப்போது, அவருக்கு சிகிச்சையளித்த இயன்முறை மருத்துவரான விழுப்புரம் கீழ்பெரும்பாக்கத்தைச் சோ்ந்த சந்தோஷ்குமாா், மாணவிக்கு பாலியல் தொந்தரவு அளித்தாராம். இதனால், அதிா்ச்சியடைந்த மாணவி மருத்துவரின் அறையிலிருந்து வெளியே வந்து தனது குடும்பத்தினரிடம் கூறினாா். இதனால், கோபமடைந்த மாணவியின் குடும்பத்தினா் மருத்துவரை தாக்கினா். இதில், காயமடைந்ததாக கூறி விழுப்புரம் அரசு மருத்துவமனையில் மருத்துவா் சந்தோஷ்குமாா் சோ்க்கப்பட்டாா்.

இதுகுறித்து விழுப்புரம் மேற்கு காவல் நிலையத்தில் மாணவி புகாா் அளித்தாா். அதன்பேரில், பாலியல் தொந்தரவு அளித்தல், பெண்களுக்கு எதிரான வன்கொடுமைத் தடுப்புச் சட்டம் ஆகிய பிரிவுகளின் கீழ் போலீஸாா் வழக்குப் பதிந்து மருத்துவா் சந்தோஷ்குமாரை சனிக்கிழமை மாலை கைது செய்தனா்.