கடலூா் மாவட்டத்தில் வடகிழக்கு பருவ மழையை எதிா்கொள்ள அனைத்துத் துறை அலுவலா்களும் தயாராக இருக்க வேண்டுமென மாவட்ட ஆட்சியா் சந்திரசேகா் சாகமூரி அறிவுறுத்தினாா்.
மாவட்டத்தில் வடகிழக்கு பருவ மழையை எதிா்கொள்ளும் வகையில் ஊராட்சி ஒன்றிய அலுவலகங்களில் மேற்கொள்ளப்பட்டுள்ள முன்னெச்சரிக்கை நடவடிக்கைகள் குறித்து மாவட்ட ஆட்சியா் ஆய்வு செய்து வருகிறாா். அதன்படி, வியாழக்கிழமை கடலூா், அண்ணாகிராமம், பண்ருட்டி, குறிஞ்சிப்பாடி ஊராட்சி ஒன்றிய அலுவலகங்களில் ஆய்வு செய்தாா்.
மழைக் கால சேதங்களை உடடினயாகச் சரிசெய்வதற்கும், மரங்கள் சாய்ந்தால் அதனை வெட்டி அப்புறப்படுத்துவதற்கும் செய்யப்பட்ட ஏற்படுகளை ஆய்வுசெய்தாா். நோய்த் தொற்று பரவாத வண்ணம் கொசு மருந்து தெளிப்பதற்கான கருவிகள் போதிய அளவில் இருப்பில் உள்ளதா, கருவிகளின் செயல்பாடுகள் சரியாக உள்ளதா எனவும் பாா்வையிட்டாா்.
மேலும், மீட்பு கருவிகளையும், கரைகளில் உடைப்பு ஏற்பட்டால் உடனடியாகச் சரிசெய்வதற்கு சவுக்கு கம்புகள், மணல் மூட்டைகள் தயாா் நிலையில் உள்ளனவா என்றும் ஆய்வு செய்தாா்.
பின்னா், அனைத்து ஊராட்சி ஒன்றியங்களிலும் அலுவலா்கள் 24 மணிநேரமும் செயல்படும் விதத்தில் தயாா் நிலையில் இருக்க வேண்டும். ஏற்கெனவே பாதிப்புக்குள்ளான இடங்களை முன்கூட்டியே கண்டறிந்து அனைத்து முன்னேற்பாடு பணிகளையும் செய்ய வேண்டும் என அறிவுறுத்தினாா்.
ஆய்வின்போது வட்டார வளா்ச்சி அலுவலா்கள் கிருஷ்ணமூா்த்தி, குமரன், சரவணன், மீரா கோமதி, சீனுவாசன், ரவிச்சந்திரன், சண்முக சிகாமணி, சதீஷ், உதவி செயற்பொறியாளா்கள் முகமது யாசின், குமுதா ஆகியோா் உடனிருந்தனா்.
முன்னதாக புதன்கிழமை பரங்கிப்பேட்டை, கீரப்பாளையம், மேல்புவனகிரி ஆகிய ஊராட்சி ஒன்றியங்களில் ஆட்சியா் ஆய்வு மேற்கொண்டாா்.