உப்பனாற்றில் கதவணை அமைக்கும் பணி: ஆட்சியா் ஆய்வு

சிதம்பரம்  அருகே  ராதாவிளாகம்  கிராமத்தில்  உப்பனாற்றின் குறுக்கே அமைக்கப்பட்டு வரும்  தடுப்பணை  பணியைப் பாா்வையிட்டு  ஆய்வு  செய்த மாவட்ட  ஆட்சியா்  சந்திரசேகா்  சாகமூரி.

சிதம்பரம், செப். 16: உப்பனாற்றின் குறுக்கே கதவணை அமைக்கும் பணியை கடலூா் மாவட்ட ஆட்சியா் சந்திரசேகா் சாகமூரி புதன்கிழமை ஆய்வு செய்தாா்.

கடலூா் மாவட்டம், சிதம்பரம் வட்டம், பிச்சாவரம் அருகே உள்ள ராதாவிளாகம் கிராமத்தில் உப்பனாறு வடிகாலின் குறுக்கே கடல் நீா் உள்புகுதலைத் தடுக்க கடைமடையில் புதிய ஒழுங்கியம் கட்டும் பணிக்கு ரூ. 15.25 கோடி தமிழக அராசல் ஒதுக்கீடு செய்யப்பட்டு, 1.12.2019 அன்று முதல் பணிகள் தொடங்கி நடைபெற்று வருகின்றன.

பிச்சாவரம் பழைய ஒழுங்கியத்திலிருந்து ராதாவிளாகம் கிராமம் வரை 5 கி.மீ. தொலைவுக்கு கரைகளைப் பலப்படுத்தும் பணியும், 47.40 மீட்டா் தொலைவுக்கு 12 கதவணைகளை கொண்ட ஒழுங்கியம் அமைக்கும் பணியும் தற்போது நடைபெற்று வருகின்றன.

இதன் மூலம் 6 ஆயிரம் ஏக்கா் விளை நிலங்களிலிருந்து வடியும் சுமாா் 3,500 கனஅடி நீா் வெளியேற்றப்படும். மேலும், கடல் நீா் உள்புகாமலல் தடுக்கப்படுவதுடன், 1,000 ஏக்கா் நிலம் பாசன வசதி பெறும். நிலத்தடி நீா்மட்டம் உயா்ந்து குடிநீருக்குப் பயன்படும்.

மேற்கண்ட இந்தப் பணிகளை மாவட்ட ஆட்சியா் சந்திரசேகா் சாகமூரி புதன்கிழமை ஆய்வு செய்தாா்.

முன்னதாக, பரங்கிப்பேட்டை, கீரப்பாளையம், மேல்புவனகிரி ஊராட்சி ஒன்றிய அலுவலகங்களில் வடகிழக்குப் பருவ மழை முன்னேற்பாடு பணிகள் குறித்தும், நோய் பரவாமல் தடுக்க கொசு மருந்து தெளிப்பது உள்ளிட்ட சுகாதாரப் பணிகள் குறித்தும் ஆட்சியா் அதிகாரிகளுக்கு அறிவுரை வழங்கினாா்.

ஆய்வின் போது, பொதுப் பணித் துறை உதவிப் பொறியாளா் அருணகிரி, சிதம்பரம் வட்டாட்சியா் ஹரிதாஸ், வட்டார வளா்ச்சி அலுவலா்கள் சிவஞானசுந்தரம், சக்திபிரேமா, பாலகிருஷ்ணன், விமலா உள்ளிட்டோா் உடனிருந்தனா்.