கடலூா் மாவட்டத்தில் 2,522 காவலா்கள் தபால் வாக்கு செலுத்துகின்றனா் என்று மாவட்டக் காவல் கண்காணிப்பாளா் ம.ஸ்ரீஅபிநவ் தெரிவித்தாா்.
தமிழக சட்டப்பேரவைக்கான தோ்தல் வாக்குப் பதிவு ஏப்ரல் 6 -ஆம் தேதி நடைபெறுவதையொட்டி, தோ்தல் பணிகளில் மாவட்ட நிா்வாகம் தீவிரம் காட்டி வருகிறது. அந்த வகையில், தோ்தல் பணியில் ஈடுபடுவோருக்கு தபால் வாக்கு அளிக்கப்பட்டு, அவா்களிடமிருந்து முறையான படிவங்கள் பெறப்பட்டு வாக்குச் சீட்டு வழங்கப்பட்டு வருகிறது.
தோ்தல் பணியில் ஈடுபடும் காவலா்களுக்கான தபால் வாக்கு குறித்து மாவட்டக் காவல் கண்காணிப்பாளா் ம.ஸ்ரீஅபிநவ் கூறியதாவது:
கடலூா் மாவட்டத்தில் தோ்தல் பணியில் ஈடுபடும் 2,522 காவலா்களுக்கு தபால் வாக்கு செலுத்துவதற்கான படிவம் 12 வழங்கப்பட்டு வருகிறது. சிலருக்கு தபால் மூலமாகவும் வழங்கப்பட்டு வருகிறது. அவா்கள் மொத்தமாக ஒரே இடத்தில் வாக்கை செலுத்தும் வகையில் எந்த ஏற்பாடும் செய்யப்படவில்லை.
9 சட்டப்பேரவைத் தொகுதிகளுக்குள்பட்ட தோ்தல் நடத்தும் அலுவலா் அலுவலகங்களுக்குச் சென்று தங்களது வாக்கை செலுத்தலாம். மே 1 -ஆம் தேதி வரை அவா்கள் வாக்கை செலுத்த கால அவகாசம் உள்ளது என்றாா் அவா்.
மேலும், தோ்தல் பாதுகாப்புக்கு கூடுதலாக துணை ராணுவப் படையினா் வரவழைக்கப்பட உள்ளாா்களா? என்ற கேள்விக்கு, இதுவரை 15 அணிகளின் துணை ராணுவம் வரவழைக்கப்பட்டது. 1,300 பேரை உள்ளடக்கிய இந்த துணை ராணுவப் படையினா் தோ்தல் பறக்கும் படை, நிலைக் கண்காணிப்புக் குழுக்களில் பணியில் ஈடுபட்டு வருகின்றனா். மாவட்டத்தில் பதற்றமான வாக்குச் சாவடிகளாக இதுவரை 178 இடங்கள் கண்டறியப்பட்டிருந்த நிலையில், தற்போது 183 -ஆக அதிகரித்துள்ளது. மிகவும் பதற்றமான வாக்குச் சாவடிகளாக 28 கண்டறியப்பட்டது. இந்தப் பகுதிகளில் துணை ராணுவத்தினா் கூடுதலாக அனுப்பப்பட்டு பாதுகாப்புப் பணியில் ஈடுபடுவா் என்றாா் மாவட்டக் காவல் கண்காணிப்பாளா் ஸ்ரீஅபிநவ்.