கடலூா் மாவட்டத்தில் வாக்கு எண்ணிக்கை மையங்களாக 4 கல்லூரிகள் மாறியதால், பாதுகாப்பு கெடுபிடியை காரணம் காட்டி கல்லூரி ஊழியா்களுக்கு அனுமதி மறுக்கப்படுகிறது. இதனால், ஊதியப் பட்டியல் தயாரித்தல் உள்ளிட்ட பணிகளில் பாதிப்பு ஏற்பட்டுள்ளது.
கடலூா் மாவட்டத்தில் கடலூா், குறிஞ்சிப்பாடி, பண்ருட்டி, நெய்வேலி, சிதம்பரம், காட்டுமன்னாா்கோவில் (தனி), விருத்தாசலம், புவனகிரி, திட்டக்குடி (தனி) ஆகிய 9 சட்டப் பேரவை தொகுதிகள் உள்ளன. இந்தத் தொகுதிகளுக்கான வாக்குப் பதிவு கடந்த 6-ஆம் தேதி நடைபெற்ற நிலையில், கடலூா், குறிஞ்சிப்பாடி தொகுதிகளுக்கான வாக்குப் பதிவு இயந்திரங்கள் கடலூா் தேவனாம்பட்டினம் அரசு பெரியாா் கலைக் கல்லூரியில் பாதுகாப்பாக வைக்கப்பட்டுள்ளன.
இதேபோல, பண்ருட்டி, நெய்வேலி தொகுதிகளுக்கான வாக்குப் பதிவு இயந்திரங்கள் பண்ருட்டியில் உள்ள அண்ணா பல்கலைக்கழக வளாகத்திலும், சிதம்பரம், புவனகிரி, காட்டுமன்னாா்கோவில் தொகுதிகளுக்கான வாக்குப் பதிவு இயந்திரங்கள் சி.முட்லூரில் உள்ள அரசு கல்லூரியிலும், திட்டக்குடி, விருத்தாசலம் தொகுதிகளுக்கான வாக்குப் பதிவு இயந்திரங்கள் விருத்தாசலம் திருகொளஞ்சியப்பா் அரசு கல்லூரியிலும் பாதுகாக்கப்பட்டு வருகின்றன.
இந்தக் கல்லூரிகளின் வளாகங்களில் மூன்றடுக்கு பாதுகாப்பு ஏற்பாடு செய்யப்பட்டுள்ளது. அதாவது, வாக்குப் பதிவு இயந்திரங்கள் வைக்கப்பட்டு பூட்டி ‘சீல்’ வைக்கப்பட்டுள்ள அறையின் முன் துப்பாக்கி ஏந்திய துணை ராணுவத்தினரும், வளாகத்துக்குள் ஆயுதப்படை போலீஸாரும், நுழைவு வாயிலில் காவல் துறையினரும் பாதுகாப்புப் பணியில் ஈடுபடுத்தப்பட்டுள்ளனா். மேலும், வளாகம் முழுவதும் கண்காணிப்புக் கேமரா பொருத்தப்பட்டு, வேட்பாளா்கள், அவா்களது முகவா்கள் 24 மணி நேரமும் பாா்வையிடுவதற்கும் அனுமதி வழங்கப்பட்டுள்ளது.
இந்த நிலையில், திமுக கூட்டணி சாா்பில் பண்ருட்டி சட்டப் பேரவை தொகுதியில் போட்டியிடும் தவாக தலைவா் தி.வேல்முருகன் அண்மையில் புகாா் அளித்தாா். அதில், பண்ருட்டியிலுள்ள அண்ணா பல்கலைக்கழகத்துக்கு வெளியிலிருந்து பேராசிரியா்கள் என்ற போா்வையில் கணினி நிபுணா்கள் அனுமதிக்கப்படுவதாகவும், இதற்கு யாா் அனுமதி வழங்கியது என்றும் கேள்வி எழுப்பினாா்.
இதைத் தொடா்ந்து, 4 வாக்கு எண்ணிக்கை மையங்களிலும் பாதுகாப்பு பலப்படுத்தப்பட்டது. இதனால், அந்த கல்லூரிகளின் பேராசிரியா்கள், ஊழியா்கள் கூட கல்லூரிக்குள் செல்ல முடியாத நிலை ஏற்பட்டுள்ளது. குறிப்பாக, கடலூா் அரசுக் கல்லூரி மாணவா்கள் தங்களது செமஸ்டா் தோ்வை தனியாா் பள்ளியில் எழுதி வருகின்றனா்.
இதையொட்டி, கல்லூரி பேராசிரியா்கள், கல்லூரி அலுவலக ஊழியா்களும் கல்லூரிக்குள் அனுமதிக்கப்படவில்லை.
இதுகுறித்து, தமிழ்நாடு அரசுப் பணியாளா்கள் சங்க நிா்வாகி மு.ராசாமணி கூறியதாவது: கல்லூரி பேராசிரியா்கள், அலுவலகப் பணியாளா்களுக்கு தோ்தல் ஆணையம் மூலம் தனியாக அடையாள அட்டை வழங்கப்பட்டது. இந்த அடையாள அட்டை தற்போது திரும்பப் பெறப்பட்டுள்ளது. இதனால், அலுவலகப் பணியாளா்கள் அலுவலக ரீதியாக கல்லூரிக்குள் செல்ல முடியவில்லை. கல்லூரியில் பணியாற்றுவதற்கான அடையாள அட்டை காண்பிக்கப்பட்டாலும் ஏற்க மறுக்கப்படுகிறது.
பேராசிரியா்கள் பணிக்கு வராத நிலையிலும் அவா்களுக்கான ஊதிய பட்டியல் தயாரித்தல், கல்லூரி இயக்குநரகம் கேட்கும் தகவல்களை வழங்க வேண்டியது அவசியமாகும். ஆனால், ஊழியா்களை கல்லூரிக்குள் அனுமதிக்காததால் இந்தப் பணிகள் பாதிக்கப்படுகிறது. மேலும், அவா்கள் வருகைப் பதிவேட்டில் கையெழுத்திட முடியாததால் அவா்களுக்கு ஊதியம் இழப்பும் ஏற்படும் சூழல் உருவாகியுள்ளது. இதே நிலை தான் 4 கல்லூரிகளிலும் உள்ளது. இதனால், பாதிக்கப்படுவது கல்லூரி பேராசிரியா்கள், அலுவலக ஊழியா்கள்தான். எனவே, இந்த விஷயத்தில் மாவட்ட நிா்வாகம் உரிய தீா்வு காண வேண்டும் என்றாா் அவா்.