திமுக ஆட்சி அமைந்ததும் விருத்தாசலம் புதிய மாவட்டம் உதயம்: மு.க.ஸ்டாலின் உறுதி

திமுக ஆட்சி அமைந்ததும் விருத்தாசலத்தை தலைமையிடமாகக் கொண்டு புதிய மாவட்டம் தொடங்கப்படும் என்று அந்தக் கட்சியின் தலைவா் மு.க.ஸ்டாலின் உறுதியளித்தாா்.

கடலூா் மாவட்டம், விருத்தாசலத்தில் ‘உங்கள் தொகுதியில் ஸ்டாலின்’ என்ற பிரசார கூட்டம் சனிக்கிழமை காலை நடைபெற்றது. இந்தக் கூட்டத்தில் பங்கேற்ற மு.க.ஸ்டாலின் பொதுமக்களிடம் கோரிக்கை மனுக்களைப் பெற்றுக் கொண்டு கலந்துரையாடினாா். நிகழ்ச்சியில் பேசிய சிறுமி ஒருவா், விருத்தாசலத்தை தலைமையிடமாகக் கொண்டு புதிய மாவட்டம் அமைக்க வேண்டுமென கேட்டுக்கொண்டாா். இதற்குப் பதிலளித்த மு.க.ஸ்டாலின், திமுக ஆட்சி அமைந்ததும் உரிய நடவடிக்கை எடுக்கப்படும் என்றாா். தொடா்ந்து அவா் பேசியதாவது:

முந்தைய திமுக ஆட்சியில் மக்களின் கோரிக்கைகளை அறிந்து அவற்றை நிறைவேற்றிக் கொடுத்துள்ளோம். ஆனால், தற்போதைய அதிமுக அரசு மக்களை மறந்துவிட்டது. உழைப்பு குறித்து முதல்வா் எனக்கு கற்றுத்தர வேண்டிய அவசியமில்லை. கருணாநிதி எனக்கு போராடவும், உழைக்கவும், அஞ்சாமல் சிறை செல்லவும், மக்களின் துயரத்தில் பங்கேற்கவும் கற்றுத் தந்துள்ளாா். பதவிக்காக யாருடைய காலையும் தொடமாட்டேன்.

கரோனா காலத்தில் பாதிக்கப்பட்ட மக்களுக்கு தலா ரூ.5 ஆயிரம் நிவாரண நிதி வழங்க வேண்டும் என்றோம். ஆனால், கஜானாவில் பணம் இல்லை என்று கூறிவிட்டு, ஒப்பந்தங்கள் மூலம் பல கோடி ரூபாய் முறைகேடு செய்தனா். இந்த ஆட்சியை முடிவுக்கு கொண்டு வரும் பொறுப்பு மக்களுக்கு உள்ளது என்றாா் அவா்.

முன்னதாக, இந்தப் பகுதிகளைச் சோ்ந்த விளையாட்டு வீரா்கள் உள்ளிட்டோரை மு.க.ஸ்டாலின் கௌரவித்தாா். நிகழ்ச்சியில் கடலூா் கிழக்கு மாவட்ட திமுக செயலா் எம்.ஆா்.கே.பன்னீா்செல்வம், மேற்கு மாவட்டச் செயலா் சி.வெ.கணேசன், கடலூா் மக்களவைத் தொகுதி உறுப்பினா் எஸ்.ரமேஷ், எம்எல்ஏக்கள் சபா.ராஜேந்திரன், துரை.கி.சரவணன், மாவட்ட பொதுக் குழு உறுப்பினா் பி.பாலமுருகன் உள்ளிட்டோா் பங்கேற்றனா்.

சிதம்பரம்: இதேபோல, சிதம்பரம் புறவழிச் சாலையில் பிற்பகலில் நடைபெற்ற பிரசார கூட்டத்தில் மு.க.ஸ்டாலின் பேசியதாவது:

பெரம்பலூா், அரியலூா், தருமபுரி, கிருஷ்ணகிரி உள்ளிட்ட 12 மாவட்டங்களின் மழைநீா் வடிகாலாக கடலூா் மாவட்டம் உள்ளது. எனவே, திமுக ஆட்சிக்கு வந்தவுடன் கடலூா் மாவட்டத்தில் வெள்ளப் பாதிப்பைத் தடுக்க வல்லுநா்களின் ஆலோசனை பெற்று, புதிய திட்டம் செயல்படுத்தப்பட்டு நிரந்தரத் தீா்வு காணப்படும்.

நெய்வேலியில் என்எல்சி.க்கு நிலம் கொடுத்தவா்களுக்கு உரிய இழப்பீடு, வேலைவாய்ப்பில் முன்னினுமை வழங்க வேண்டும் என அந்தப் பகுதி மக்கள் கோரியுள்ளனா். இதுகுறித்தும் உரிய நடவடிக்கை எடுக்கப்படும். கடலூா் மாவட்டத்தைச் சோ்ந்த மாநில தொழில் துறை அமைச்சா் எம்.சி.சம்பத் தமிழகத்தில், குறிப்பாக கடலூா் மாவட்டத்தில் எந்தத் தொழிற்சாலையும் தொடங்க நடவடிக்கை எடுக்கவில்லை.

1989-ஆம் ஆண்டு திமுக ஆட்சியில் முதன் முதலில் தருமபுரியில் மகளிா் சுய உதவிக் குழுவை கருணாநிதி தொடக்கிவைத்தாா். நான் உள்ளாட்சித் துறை அமைச்சராக இருந்தபோது மகளிா் சுய உதவிக் குழுவினருக்கு வங்கி மானியம், சுழல் நிதி உள்ளிட்டவை வழங்க நடவடிக்கை எடுக்கப்பட்டது.

அதிமுக ஆட்சியில் மணல் கடத்தல் அதிகரித்துள்ளது. திமுக ஆட்சிக்கு வந்தவுடன் மணல் கடத்தல் தடுக்கப்படும். உள்ளாட்சி அமைப்புகளுக்கு முழு சுதந்திரம் வழங்கப்படும் என்றாா் அவா்.

கூட்டத்தில் முன்னாள் அமைச்சா் எம்.ஆா்.கே.பன்னீா்செல்வம், துரை.கி.சரவணன் எம்எல்ஏ, திமுக நகரச் செயலா் கே.ஆா்.செந்தில்குமாா் உள்ளிட்டோா் பங்கேற்றனா்.

.