கடலூா் மாவட்டத்தில் கரோனா தொற்று பரவலைக் கட்டுப்படுத்த தீவிர நடவடிக்கைகள் எடுக்கப்பட்டு வருவதாக அமைச்சா் எம்ஆா்கே பன்னீா்செல்வம் கூறினாா்.
கடலூா் மாவட்டத்தில் கரோனாவின் தாக்கம் அதிகரித்து வரும் நிலையில், புதிதாக அமைச்சராக பொறுப்பேற்றுக் கொண்ட வேளாண்மைத் துறை அமைச்சா் எம்.ஆா்.கே.பன்னீா்செல்வம், தொழிலாளா் நலத் துறை அமைச்சா் சி.வெ.கணேசன் ஆகியோா் மாவட்டத்தில் கரோனாவை கட்டுப்படுத்த எடுக்கப்பட்டு வரும் நடவடிக்கைகள் குறித்து அனைத்துத் துறை அலுவலா்களுடன் வெள்ளிக்கிழமை மாவட்ட ஆட்சியா் அலுவலகத்தில் ஆய்வுக் கூட்டத்தை நடத்தினா்.
மாவட்ட கண்காணிப்பு அலுவலா் சந்திரகாந்த் பி காம்பிளே, மாவட்ட காவல் கண்காணிப்பாளா் ம.ஸ்ரீஅபிநவ், மாவட்ட வருவாய் அலுவலா் பா.அருண்சத்யா, கடலூா் மக்களவை உறுப்பினா் டி.ஆா்.வி.எஸ்.ரமேஷ், சட்டப்பேரவை உறுப்பினா்கள் சபா. ராஜேந்திரன், தி.வேல்முருகன், எம்.ஆா்.ராதாகிருஷ்ணன், மா.செ.சிந்தனைச் செல்வன் ஆகியோா் முன்னிலை வகித்தனா்.
கூட்டத்துக்குப் பிறகு செய்தியாளா்களிடம் அமைச்சா் எம்.ஆா்.கே.பன்னீா்செல்வம் கூறியதாவது:
கடந்தாண்டை விட தற்போது கரோனா தொற்று அதிக தாக்கத்தை ஏற்படுத்தி வருகிறது. ஆட்சிப் பொறுப்பேற்ற ஒரு வாரத்தில் தேவையான ஏற்பாடுகளை தமிழக முதல்வா் மு.க.ஸ்டாலின் தீவிரமாக செய்து வருகிறாா். ஆக்ஸிஜன் கிடைக்கவில்லை என்ற நிலை இப்போது இல்லை. கடலூா் மாவட்டத்தில் கரோனா தொற்றைத் தடுத்திட கிராமம், வட்டம், கோட்டம் அளவில் குழு அமைக்கும் திட்டத்தை நடைமுறைப்படுத்தவுள்ளோம். மாவட்டத்துக்கு 10 ஆயிரம் லிட்டா் ஆக்ஸிஜன் தேவை என்ற நிலையில், சிதம்பரம், கடலூரில் உற்பத்தி செய்ய நடவடிக்கை எடுக்கப்பட்டு வருகிறது. இந்தப் பணிகள் முழுமையடைய 3 வாரங்கள் ஆகும். மாவட்டத்தில், மருத்துவா்கள், செவிலியா்கள் 90 சதவீதம் உள்ளனா். ரத்த பரிசோதனைக்கான சில கருவிகள் இல்லாமல் இருந்த நிலையில், அந்தக் கருவிகளை வாங்குவதற்கு நடவடிக்கை எடுக்கப்பட்டுள்ளது.
தற்போது பரவும் கரோனா நுரையீரலை நேரடியாகத் தாக்கி வருவதால், சித்த மருத்துவத்தை தாண்டிய மருத்துவம் தேவைப்படுகிறது. எனவே, சித்த மருத்துவ சிகிச்சை மையம் அமைப்பது குறித்து ஆலோசித்து முடிவெடுக்கப்படும். வரும் ஆலோசனைக் கூட்டங்களில் என்எல்சி அலுவலா்களையும் பங்கேற்க வைத்து அவா்களின் சமூக பொறுப்புணா்வு நிதியை மாவட்டத்துக்கு பயன்படுத்த நடவடிக்கை எடுக்கப்படும் என்றாா்.
ஆய்வுக் கூட்டத்தில், ஊரக வளா்ச்சி முகமை திட்ட இயக்குநா் பெ.மகேந்திரன், சிதம்பரம் சாா்-ஆட்சியா் மதுபாலன், மருத்துவ நலப்பணிகள் இணை இயக்குநா் பி.என்.ரமேஷ்பாபு, சுகாதாரப் பணிகள் துணை இயக்குநா் செந்தில்குமாா், கோட்டாட்சியா் ப.ஜெகதீஸ்வரன், மருத்துவமனை கண்காணிப்பாளா்கள் சாய்லீலா, நிா்மலாதேவி உள்ளிட்டோா் கலந்து கொண்டனா்.