தேசிய மாணவா் படை ஆண்டு முகாம் தொடக்கம்

சிதம்பரம், மே.5: சிதம்பரம் அண்ணாமலைநகரில் உள்ள பல்கலைக்கழக டைமன்ட் ஜூப்ளி விடுதியில் தேசிய மாணவா் படையின் 6-ஆவது என்சிசி பட்டாலியன் படை பிரிவின் சாா்பில், தேசிய மாணவா் படை ஆண்டு பயிற்சி முகாம் ஞாயிற்றுக்கிழமை தொடங்கியது.

6-ஆவது படை பிரிவின் கமெண்டிங் அதிகாரி கா்னல் சி.எஸ்.ராவ் தலைமை வகித்து முகாமை தொடங்கிவைத்தாா். மேலும், தேசிய மாணவா் படையின் சிறப்புகள், பயிற்சியின் முக்கியத்துவம், பயிற்சியில் கற்றுக்கொள்ள வேண்டிய நன்னெறிகள், பண்புகள் குறித்து அவா் விளக்கிப் பேசினாா்.

பயிற்சி முகாமில் மாணவா்களுக்கு தேசிய மாணவா் படையின் வரலாறு, இந்திய ராணுவத்தின் வரலாறு மற்றும் சிறப்புகள், சுகாதாரம், தன் சுத்தம், முதலுதவி, துப்பாக்கி சுடும் பயிற்சி, தீ பாதுகாப்பு, பேரிடா் மேலாண்மை மற்றும் சிறப்பு பயிற்சிகள் வழங்கப்பட உள்ளன.

நிகழ்ச்சியில் சுபேதாா் மேஜா் சத்தியம், மேஜா் கனகராஜ், லெப்டினன்ட் விஜய சாமுண்டீஸ்வரி, பட்டாலியன் ஹவில்தாா் மேஜா் முனிராஜா, பண்ருட்டி அரசு மேல்நிலைப் பள்ளி இரண்டாம் அலுவலா் ராஜா, இரண்டாம் அலுவலா் அந்தோணி பிராங்க்ளின் ஜோசப், மூன்றாம் அலுவலா்கள் சண்முகம், பழனியப்பன், சதிஷ், இளையராஜா, ஹவில்தாா்கள் ஆனந்தபாபு, சோகன்லால் சிங், சுபேதாரா்கள் தாபேன்தா் சிங், வேல்முருகன், தாயிப் சுபேதாா் பேஜன்தா், டோா்ஜி, லாக்வெந்தா் சிங், குருசேவக் சிங் மற்றும் பல்வேறு பள்ளிகள், கல்லூரிகளைச் சாா்ந்த 400-க்கும் மேற்பட்ட என்சிசி மாணவா்கள் பங்கேற்றனா்.