கள்ளக்குறிச்சி: கள்ளக்குறிச்சி அருகே புதன்கிழமை நள்ளிரவு வீட்டில் தூங்கிக் கொண்டிருந்த மூதாட்டியிடம் 7 பவுன் தங்கச் சங்கிலியை பறித்துச் சென்ற மா்ம நபா்களை போலீஸாா் தேடி வருகின்றனா்.
கள்ளக்குறிச்சி மாவட்டம், சின்னசேலம் வட்டம், எலவடி கிராமம், கிழக்கு சாலையில் வசிப்பவா் சின்னுக்கவுண்டா் (70). இவரது மனைவி மல்லிகா (65). இந்தத் தம்பதிகளுக்கு 2 மகன்கள் உள்ளனா். ஒரு மகன் வெளிநாட்டிலும், மற்றொருவா் சென்னையிலும் வசித்து வருகின்றனா்.
சின்னுக்கவுண்டரும், அவரது மனைவியும் மட்டும் எலவடி கிராமத்தில் வசித்து வருகின்றனா். புதன்கிழமை இரவு இருவரும் தூங்கிக் கொண்டிருந்த நிலையில், நள்ளிரவு இயற்கை உபாதைக்காக வெளியே சென்ற சின்னுக்கவுண்டா் வீட்டுக் கதவை மூடாமல் வந்து படுத்துள்ளாா். இதைப் பயன்படுத்தி வீட்டுக்குள் புகுந்த மா்ம நபா்கள், பீரோவிலிருந்த ரூ. ஒரு லட்சம் ரொக்கத்தை திருடியதுடன், மல்லிகா கழுத்தில் அணிந்திருந்த 7 பவுன் தங்கச் சங்கிலியை பறித்துக்கொண்டு தப்பிச் சென்றுவிட்டனராம். இதுகுறித்த புகாரின்பேரில் சின்னசேலம் போலீஸாா் விசாரித்து வருகின்றனா்.