பள்ளிப் பேருந்துகளை இயக்கி பாா்த்து ஆய்வு செய்த ஆட்சியா்

கள்ளக்குறிச்சி மாவட்டத்தில் பள்ளிப் பேருந்தை வியாழக்கிழமை இயக்கி பாா்த்து ஆய்வு செய்த ஆட்சியா் ஷ்ரவன் குமாா்.

கள்ளக்குறிச்சி மாவட்டத்தில் பள்ளிப் பேருந்துகளை ஆட்சியா் ஷ்ரவன் குமாா் வியாழக்கிழமை ஆய்வு மேற்கொண்டாா்.

இதன்பிறகு ஆட்சியா் செய்தியாளா்களிடம் கூறியதாவது:

கள்ளக்குறிச்சி வட்டாரப் போக்குவரத்து அலுவலகம் சாா்பில் 49 பள்ளிகளில் உள்ள 510 பள்ளிப் பேருந்துகளில் 352 பேருந்துகள் ஆய்வுக்கு உள்படுத்தப்பட்டன.

பேருந்துகளில் பிரேக், இருக்கைகள், அவசர வழிக் கதவு, முதலுதவி பெட்டிகள் உள்ளனவா என பாா்வையிடப்பட்டது. இதில் 63 பேருந்துகளில் இயக்க நிலைகள் மற்றும் பாதுகாப்பு குறைபாடுகளைக் கண்டறியப்பட்டது. இந்தக் குறைகளை நீக்கி, மறுஆய்விற்கு உட்படுத்த அறிவுறுத்தி திருப்பி அனுப்பி வைக்கப்பட்டன.

உளுந்தூா்பேட்டை வட்டார போக்குவரத்து அலுவலகம் சாா்பில் 24 பள்ளிகளில் உள்ள 104 பள்ளி பேருந்துகளில் 63 பேருந்துகள் ஆய்வுக்கு உட்படுத்தப்பட்டன. இவற்றில் 6 பேருந்துகளின் இயக்க நிலைகள் மற்றும் பாதுகாப்புக் குறைபாடுகள் இருந்தது கண்டுபிடிக்கப்பட்டு அவற்றை சரிசெய்து மறு ஆய்வுக்கு உள்படுத்த 6 பேருந்துகள் திருப்பி அனுப்பப்பட்டன என்றாா்.

திருக்கோவிலூா் வட்டத்துக்கு உள்பட்ட 8 பள்ளிகளின் 74 பள்ளிப் பேருந்துகள் வரும் 15-ஆம் தேதி ஆய்வு மேற்கொள்ளப்படவுள்ளன.

முன்னதாக போக்குவரத்து மற்றும் தீயணைப்புத் துறையின் சாா்பில் திடீரென பேருந்துகள் தீப்பிடித்து எரிந்தால் அதனை எவ்வாறு அணைப்பது என்று கள்ளக்குறிச்சி உதவி தீயணைப்புத் துறை அலுவலா் இரா.ஜமுனா ராணி ஓட்டுநா்களுக்கு செயல்முறை விளக்கம் அளித்தாா்.

ஓட்டுநா்களுக்கு சாலைப் பாதுகாப்பு விழிப்புணா்வு பயிற்சி வகுப்பு வட்டார போக்குவரத்து அலுவலகம் சாா்பில் நடத்தவும், அனைத்து ஓட்டுநா்களுக்கும் காப்பீடு வசதி ஏற்படுத்தவும் வட்டார போக்குவரத்துத் துறை அலுவலரிடம் ஆட்சியா்அறிவுறுத்தினாா்.

ஆய்வின்போது கள்ளக்குறிச்சி வருவாய் கோட்டாட்சியா் சு.லூா்துசாமி, வட்டார போக்குவரத்து அலுவலா் ஜெ.ஜெயபாஸ்கரன், கள்ளக்குறிச்சி காவல் துணைக் கண்காணிப்பாளா் தேவராஜ், மாவட்ட கல்வி அலுவலா் (தனியாா் பள்ளிகள்) ஜெ.துரைராஜ், கள்ளக்குறிச்சி மோட்டாா் வாகன ஆய்வாளா் இரா.செல்வம், கள்ளக்குறிச்சி வட்டாட்சியா் பிரபாகரன், உளுந்தூா்பேட்டை மோட்டாா் வாகன ஆய்வாளா் ஜி.ராஜ்குமாா் உள்ளிட்டோா் உடனிருந்தனா்.