தேர்தல் பயிற்சி வகுப்பில் பங்கேற்காத 2 அரசு ஊழியர்கள் பணியிடை நீக்கம்

தேர்தல் பயிற்சி வகுப்பில் பங்கேற்காத 2 அரசு ஊழியர்கள் பணியிடை நீக்கம் செய்யப்பட்டனர்.
இதுகுறித்து புதுச்சேரி மாவட்ட தேர்தல் அதிகாரியும், ஆட்சியருமான 
டி.அருண் வெளியிட்ட செய்திக் குறிப்பு:
தேர்தல் நாளன்று வாக்குச் சாவடிகளில் பணியாற்றும் அதிகாரிகள், அலுவலர்கள் கணினி மூலம் தற்செயல் கலப்பு முறையில் தேர்ந்தெடுக்கப்பட்டு, தேர்தல் பணி குறித்த இரண்டு கட்டமாக பயிற்சிகள் அளிக்கப்பட்டன.
2-ஆம் கட்டப் பயிற்சி வகுப்பில் பங்கேற்காத 2 அரசு ஊழியர்கள் பணியிடை நீக்கம் செய்யப்பட்டனர். அந்த இரு ஊழியர்கள் மீது சட்டப்படி துறை ரீதியான ஒழுங்கு நடவடிக்கைக்கு பரிந்துரை செய்யப்பட்டுள்ளது.
அனைத்து வாக்குச் சாவடி அதிகாரிகளுக்கும் தேர்தல் பணியின் முக்கியத்துவத்தைக் கருத்தில் கொண்டு, வெள்ளிக்கிழமை முதல் வருகிற 16 -ஆம் தேதி வரை நடைபெறும் மூன்றாம் கட்டப் பயிற்சியில் தவறாது பங்கேற்க வேண்டும் என அறிவுறுத்தப்பட்டுள்ளது. பயிற்சி வகுப்பில் பங்கேற்காத அதிகாரிகள் மீது சட்டப்படி கடுமையான நடவடிக்கை எடுக்கப்படும் என அந்தச் செய்திக் குறிப்பில் தெரிவிக்கப்பட்டுள்ளது.