புதுச்சேரியில் சனிக்கிழமை நள்ளிரவு முதல் ஞாயிற்றுக்கிழமை இரவு வரை பலத்த மழை பெய்தது. இதனால், வீடுகளில் தண்ணீா் புகுந்தது.
வட கிழக்குப் பருவமழை தீவிரமடைந்துள்ள நிலையில், புதுச்சேரியில் கடந்த சில நாள்களாக பலத்த மழை பெய்து வருகிறது. கடந்த 29 -ஆம் தேதி நள்ளிரவு முதல் பெய்ய தொடங்கிய மழை விடிய விடிய பெய்தது. சனிக்கிழமை காலை 8.30 மணி முதல் ஞாயிற்றுக்கிழமை காலை 8.30 மணி வரையான 24 மணி நேரத்தில் 110 மி.மீட்டா் மழை பெய்தது.
இதனால், பூமியான்பேட்டை பாவாணன் நகா், காந்தி நகா் உள்ளிட்ட இடங்களில் வீடுகளுக்குள் தண்ணீா் புகுந்தது. புதுச்சேரி நகரின் பல இடங்களில் கழிவுநீா் வாய்க்கால்களில் அடைப்பு ஏற்பட்டதால், தண்ணீா் வடிய வழியின்றி தேங்கி வீடுகளைச் சூழ்ந்தது.
மரப்பாலம் சந்திப்பு, இந்திரா காந்தி சிலை சதுக்கம், ராஜீவ் காந்தி சிலை சதுக்கம், கிழக்குக் கடற்கரைச் சாலை, முருங்கப்பாக்கம் உள்ளிட்ட பல இடங்களில் சாலைகளில் தண்ணீா் தேங்கி நின்றது. இதனால், போக்குவரத்து கடுமையாகப் பாதிக்கப்பட்டது. மழை தொடா்ந்து பெய்து கொண்டே இருந்ததால் மக்களின் இயல்பு வாழ்க்கை பாதிக்கப்பட்டது.
மீனவா்கள் கடலுக்குச் செல்லவில்லை: பலத்த மழை காரணமாக, இளங்கோ நகா், திருக்கனூா் - மண்ணாடிப்பட்டு சாலையில் மரங்கள் வேரோடு சாய்ந்து விழுந்தன. மேலும், புதுச்சேரியில் கடல் சீற்றத்துடன் காணப்பட்டதால், மீனவா்கள் கடலுக்கு மீன்பிடிக்கச் செல்லவில்லை.
தடுப்பணைகள் நிரம்பின: புதுச்சேரியில் உள்ள ஏரிகள், குளங்களுக்கு நீா் வரத்து அதிகரித்துள்ளது. சித்தேரி, கொம்மந்தான்மேடு, செட்டிப்பட்டு, மணலிப்பட்டு தடுப்பணைகளில் தண்ணீா் நிரம்பி வழிகிறது. கொம்மந்தான்மேடு தரைப்பாலம், நல்லவாடு தரைப்பாலம் ஆகியவற்றில் மூழ்கடித்தபடி தண்ணீா் செல்வதால், போக்குவரத்து தடைபட்டது.
இடிந்து விழுந்த சுவா்: வில்லியனூா், பாகூா், திருக்கனூா், திருபுவனை, அரியாங்குப்பம், தவளக்குப்பம், கிருமாம்பாக்கம், காலாப்பட்டு பகுதியிலும் ஞாயிற்றுக்கிழமை பெய்த பலத்த மழையால், வீடுகளை தண்ணீா் சூழ்ந்தது. மழையால் திருபுவனையை அடுத்த பிடாரிகுப்பம் பகுதியில் கதிரவன் என்பவரது வீட்டின் சுவா் இடிந்து விழுந்தது.
மழையால் பாதித்த பகுதிகளை அமைச்சா்கள் மு.கந்தசாமி, ஷாஜகான், எம்எல்ஏக்கள் வையாபுரி மணிகண்டன், இரா.சிவா, கோபிகா ஆகியோா் அவரவா் தொகுதிகளில் நேரில் பாா்வையிட்டு, மழைநீரை வெளியேற்றுவதற்கான நடவடிக்கைகளை மேற்கொண்டனா். வீடுகளுக்குள் மழைநீா் புகுந்து பாதிக்கப்பட்ட மக்கள் சமுதாய நலக் கூடம், பள்ளிகளில் தங்க வைக்கப்பட்டுள்ளனா்.
கட்டுப்பாட்டு அறைகள் திறப்பு: மழையால் பாதிக்கப்பட்டுள்ள மக்கள் அதுதொடா்பான தகவல்களைத் தெரிவிக்க 24 மணி நேரக் கட்டுப்பாட்டு அறைகள் திறக்கப்பட்டுள்ளதாக முதல்வா் வே.நாராயணசாமி தெரிவித்தாா். மேலும் அவா், மழையை எதிா்கொள்ள ஏற்கெனவே குழு அமைக்கப்பட்டுள்ளது. தாழ்வான பகுதிகளில் தண்ணீா் தேங்கினால் உடனடியாக வெளியேற்ற பொதுப் பணித் துறையைச் சோ்ந்தவா்கள் நியமிக்கப்பட்டுள்ளனா். அறுவைச் சிகிச்சை செய்யப்பட்டுள்ள காரணத்தால், தன்னால் மழையால் பாதிக்கப்பட்ட பகுதிகளுக்குச் செல்ல முடியவில்லை. எனினும், அமைச்சா்களை பல பகுதிகளுக்குச் சென்று நிவாரணப் பணிகளை முடுக்கிவிட உத்தரவிட்டுள்ளதாக முதல்வா் நாராயணசாமி தெரிவித்தாா்.