புதுச்சேரி காமராஜர் நகர் தொகுதிக்கான இடைத் தேர்தலில் நாம் தமிழர் கட்சி வேட்பாளர் உள்பட மூன்று பேர் வெள்ளிக்கிழமை தங்களது வேட்புமனுக்களைத் தாக்கல் செய்தனர்.
இந்தத் தொகுதிக்கான இடைத் தேர்தல் கடந்த செப். 21-ஆம் தேதி அறிவிக்கப்பட்டது. தேர்தலில் போட்டியிட விரும்புபவர்களிடம் கடந்த 23-ஆம் தேதி முதல் செப். 30-ஆம் தேதி வரை வேட்புமனுக்கள் பெறப்படும் என அறிவிக்கப்பட்டது.
உப்பளம் கோலாஸ் நகரில் உள்ள சுற்றுலாத் துறை அலுவலகத்தில், தேர்தல் அதிகாரி முகமது மன்சூரிடம் வேட்புமனுக்களைத் தாக்கல் செய்ய ஏற்பாடு செய்யப்பட்டது. எனினும், கடந்த 4 நாள்களாக யாரும் வேட்புமனுவைத் தாக்கல் செய்யவில்லை.
இந்த நிலையில் 5-ஆவது நாளான வெள்ளிக்கிழமை நாம் தமிழர் கட்சி சார்பில் பிரவீனா மதியழகன், சோசியலிஸ்ட் யுனிட்டி சென்டர் ஆப் கம்யூனிஸ்ட் கட்சி சார்பில் காளிமுத்து லெனின் துரை, அகில இந்திய மக்கள் கழகம் சார்பில் கோவிந்தராஜ் ஆகிய 3 பேர் வேட்புமனுக்களைத் தாக்கல் செய்தனர்.
சனி, ஞாயிறு (செப். 28, 29) விடுமுறை என்பதால் வேட்புமனுக்கள் பெறப்படமாட்டாது. திங்கள்கிழமைதான் (செப். 30) வேட்புமனுவைத் தாக்கல் செய்ய முடியும். அன்றைய தினம் வேட்புமனு தாக்கல் கடைசி நாளாகும்.