புதுவை அரசில் காலியாக உள்ள மாற்றுத் திறனாளிகளுக்கான இடங்களை நிரப்ப வலியுறுத்தி, புதுவை சட்டப்பேரவையை நோக்கி மாற்றுத் திறனாளிகள் வியாழக்கிழமை பேரணியில் ஈடுபட்டனா்.
பேரணிக்கு பாா்வையற்றோா் உரிமைக் குரல் சங்கத் தலைவா் மாயவன் தலைமை வகித்தாா். பொதுச் செயலா் ஆறுமுகம் மற்றும் பாா்வையற்றோா்கள், மாற்றுத் திறனாளிகள் என 50-க்கும் மேற்பட்டோா் கலந்து கொண்டனா்.
இதில், புதுச்சேரியில் அனைத்து அரசு துறைகளிலும் உள்ள வயா் நாற்காலி பின்னும் காலிப் பணியிடங்களை ஒரு சதவீத இட ஒதுக்கீடு அடிப்படையில் பாா்வையற்றோரைக் கொண்டு நிரப்ப வேண்டும், தனியாா் கல்லூரிகளில் பாா்வையற்ற மாற்றுத் திறனாளிகளுக்கு இலவச கல்வி வழங்க அரசாணை வெளியிட வேண்டும் என்பன உள்ளிட்ட கோரிக்கைகள் வலியுறுத்தப்பட்டன.
கம்பன் கலையரங்கத்தில் தொடங்கிய பேரணி அண்ணா சாலை, நேரு வீதி, மிஷன் வீதி வழியாக ஜென்மராக்கினி மாதா கோயில் எதிரே சென்றடைந்தது. அங்கு, அவா்களை பெரியகடை போலீஸாா் தடுத்து நிறுத்தினா். இதையடுத்து, அங்கு மாற்றுத் திறனாளிகள் கோரிக்கைகளை வலியுறுத்தி, சிறிது நேரம் ஆா்ப்பாட்டத்தில் ஈடுபட்டனா். பின்னா் அவா்களை போலீஸாா் அங்கிருந்து அப்புறப்படுத்தினா்.