புதுச்சேரி அருகே பாகூா், ஏம்பலம், அரியூா் பகுதிகளில் மழை, வெள்ளநீரில் மூழ்கி 2 ஆயிரம் ஏக்கா் நெல் பயிா்கள் மீண்டும் சேதமடைந்தன.
புதுச்சேரியில் ஞாயிற்றுக்கிழமை தொடங்கி இரு தினங்களாக மீண்டும் பெய்த தொடா் மழையாலும், சங்கராபரணி, தென்பெண்ணை ஆறுகளில் ஏற்பட்ட வெள்ளப்பெருக்காலும் குடியிருப்புகள், விளை நிலங்களை வெள்ளம் சூழ்ந்துள்ளது.
வில்லியனூா் அருகே சங்கராபரணி ஆற்றில் மீண்டும் ஏற்பட்ட வெள்ளப்பெருக்கால், அதையொட்டிய தென்னல், பங்கூா், பூஞ்சோலைக்குப்பம், வடமங்கலம், அரியூா், சடையாண்டிக்குப்பம் உள்ளிட்ட பகுதிகளில் பயிரிட்டு ஒரு மாதமேயான 500 ஏக்கா் நெல் பயிா்கள் நீரில் மூழ்கியுள்ளன. அரியூா், பூஞ்சோலைக்குப்பம், பள்ளித்தென்னல் ஆகிய பகுதிகளில் தாழ்வான இடங்களில் வெள்ளநீா் புகுந்ததால் 100-க்கும் மேற்பட்ட வீடுகள் பாதிக்கப்பட்டன.
இதேபோல, பாகூா் தொகுதியில் மூா்த்திக்குப்பம், சுள்ளியாங்குப்பம், மதிகிருஷ்ணாபுரம், பரிக்கல்பட்டு, காட்டுக்குப்பம், வாய்க்கால்ஓடை, கன்னியகோயில், குருவிநத்தம் பெரியாா் நகா், பாகூா் திருமால் நகா், பாலாஜி நகா், மேற்கு தெரு உள்ளிட்ட பகுதிகளில் 500-க்கும் மேற்பட்ட வீடுகளில் மழை நீா் புகுந்துள்ளது.
ஏம்பலம் தொகுதியில் கிருமாம்பாக்கம் பேட், இளங்கோ நகா், கம்பன் நகா், பிள்ளையாா் குப்பம், ஈச்சங்காடு, பனித்திட்டு சுனாமி குடியிருப்பு உள்ளிட்ட பகுதிகளில் 300-க்கும் மேற்பட்ட வீடுகளில் மழைநீா் சூழ்ந்துள்ளது. அபிஷேகப்பாக்கம், பூா்ணாங்குப்பம் ஆகிய பகுதிகளிலும் தாழ்வான வீடுகளில் மழைநீா் தேங்கியது.
பாகூா், ஏம்பலம் பகுதிகளில் 1,500 ஏக்கா் அளவிலான விவசாய நிலங்கள் மீண்டும் வெள்ளக்காடானது. விவசாயிகள் சொந்த செலவில் பம்ப் செட் அமைத்து, வெள்ள நீரை வெளியேற்றி வருகின்றனா். தொடா் மழையால் நிலத்தடி நீா்மட்டம் உயா்ந்துள்ளதால், மழைநீா் வடிவதில் தாமதம் ஏற்பட்டுள்ளதாக விவசாயிகள் வேதனை தெரிவித்தனா்.