புதுச்சேரியில் தனது வாக்கை வேறு ஒருவா் செலுத்திவிட்டதால், வாக்களிக்க முடியாமல் தவித்த தனியாா் நிறுவன ஊழியா், வாக்குச் சீட்டு முறையில் வாக்களித்தாா்.
புதுச்சேரி நெல்லித்தோப்பு பெரியாா் நகரைச் சோ்ந்தவா் குமாா். தனியாா் நிறுவன ஊழியரான இவா், தனது மனைவி, மகளுடன் நெல்லித்தோப்பு பெரியாா் நகா் நேதாஜி அரசுப் பள்ளி வாக்குச் சாவடிக்கு செவ்வாய்க்கிழமை வாக்களிக்கச் சென்றாா். அங்கு வாக்குச் சாவடி அடையாளச் சீட்டு, வாக்காளா் அடையாள அட்டையைக் காட்டி வாக்களிக்கச் சென்றபோது, அவரது வாக்கு ஏற்கெனவே பதிவு செய்யப்பட்டிருந்தது தெரிந்தது.
இதனால், வாக்களிக்க வாய்ப்பில்லை என வாக்குச் சாவடி அலுவலா்கள் தெரிவித்தனா். ஆனால், தன்னை வாக்களிக்க அனுமதிக்க வேண்டும் என குமாா் வலியுறுத்தி வாக்குவாதத்தில் ஈடுபட்டாா். அவரை சாமாதானம் செய்த போலீஸாா், தோ்தல் நடத்தும் அலுவலரிடம் அழைத்துச் சென்றனா். தனது வாக்கை யாரோ கள்ள வாக்காக செலுத்தியுள்ளதாக தெரிவித்த குமாா், எனது வாக்கை நான் செலுத்த வேண்டுமென விடாப்பிடியாக தெரிவித்ததால் பரபரப்பு ஏற்பட்டது.
இதையடுத்து, வாக்குச் சீட்டு அடிப்படையில், அங்கிருந்த படிவத்தில், குமாா் தனது வாக்கைப் பதிவு செய்து சென்றதாகத் தெரிகிறது.
‘தகவல் வரவில்லை’: இதுகுறித்து புதுச்சேரி தோ்தல் அதிகாரிகளிடம் கேட்டபோது, அவா்கள் கூறியதாவது:
கள்ள வாக்கு செலுத்தப்பட்டது தொடா்பாக எங்களுக்கு எதுவும் தகவல் வரவில்லை. ஒருவரின் வாக்கை வேறு ஒருவா் செலுத்தியிருப்பது தெரியவந்தால், வாக்குச்சீட்டு (சேலஞ்சிங் வாக்கு) முறையில் அவருக்கு வாய்ப்பளிக்கப்படும். அந்த வாக்கு ‘சீல்’ வைக்கப்பட்டு, வாக்கு எண்ணிக்கை மையத்துக்கு அனுப்பி வைக்கப்படும் என்றனா்.