புதுவையில் ராஜிநாமா செய்த தீப்பாய்ந்தான் எம்எல்ஏ உள்பட 13 போ் காங்கிரஸ் கட்சியிலிருந்து செவ்வாய்க்கிழமை அதிரடியாக நீக்கப்பட்டனா்.
புதுவை அரசில், அமைச்சராக இருந்த காங்கிரஸ் கட்சியைச் சோ்ந்த ஆ. நமச்சிவாயம் திங்கள்கிழமை பதவியை ராஜிநாமா செய்தாா். அவருடன் ஊசுடு தொகுதி எம்எல்ஏ இ. தீப்பாய்ந்தானும் ராஜிநாமா செய்தாா். முன்னதாக, ஆ. நமச்சிவாயத்தை கட்சியின் அடிப்படை உறுப்பினா் பதவியிலிருந்து புதுவை காங்கிரஸ் தலைவா் ஏ.வி.சுப்பிரமணியன் அதிரடியாக நீக்கினாா். மேலும், அவருடன் தொடா்பில் உள்ளவா்களும் நீக்கப்படுவா் என அறிவித்தாா்.
இந்த நிலையில், காங்கிரஸ் கட்சிக்கு எதிராக செயல்பட்ட எம்எல்ஏ இ. தீப்பாய்ந்தான், மாநிலப் பொதுச்செயலாளா்கள் கே.ஏகாம்பரம், ஏ.வி. வீரராகவன், வி. கண்ணபிரான், மாநிலச் செயலா்கள் எஸ்.கே. சம்பத், எஸ். சாம்ராஜ், உறுப்பினா் என். சரவணன், மண்ணாடிபட்டு தொகுதித் தலைவா் டிஎஸ்ஏ. கண்னன், திருபுவனை தொகுதித் தலைவா் எஸ்.ஆா். பாஸ்கரன், ஊசுடு தொகுதித் தலைவா் கே. அருணகிரி, மாநில இளைஞா் காங்கிரஸ் தலைவா் ஆா். ரமேஷ், அகில இந்திய அமைப்புசாரா தொழிலாளா் காங்கிரஸ் நிா்வாகி ஏ.ஆா். செல்வகணபதி, காங்கிரஸ் கட்சியின் சமூக ஊடக நிா்வாகி டி. காமராஜ் ஆகியோா் கட்சியின் அடிப்படை உறுப்பினா் பதவியிலிருந்து இடைநீக்கம் செய்யப்பட்டதாக மாநிலத் தலைவா் ஏ.வி. சுப்பிரமணியன் செவ்வாய்க்கிழமை அறிவித்தாா்.