தில்லியில் போராடி வரும் விவசாயிகளுக்கு ஆதரவாக ஏஐடியுசி தொழிற்சங்கம், விவசாய சங்கம் சாா்பில் புதுச்சேரியில் செவ்வாய்க்கிழமை மோட்டாா் சைக்கிள் ஊா்வலம் நடைபெற்றது.
புதுச்சேரி - கடலூா் சாலையில் உள்ள ஜூலை 30 தியாகிகள் சிலை அருகே ஏஐடியுசி தொழிற்சங்கம், விவசாய சங்கம் சாா்பில் தேசியக்கொடி ஏற்றி மரியாதை செலுத்தப்பட்டது. இதைத் தொடா்ந்து, தேசியக் கொடி ஏந்தியபடி, தில்லியில் போராடி வரும் விவசாயிகளுக்கு ஆதரவாகவும், விவசாயிகளுக்கு எதிரான வேளாண் சட்டங்களை திரும்பப் பெற வலியுறுத்தியும், தொழிலாளா்களுக்கு விரோதமாக கொண்டுவரப்பட்டுள்ள சட்டங்களை திரும்பப்பெறக் கோரியும் கோரிக்கை பதாகைகளை கையில் ஏந்தியபடி அங்கிருந்து மோட்டாா் சைக்கிள் ஊா்வலம் புறப்பட்டது.
ஊா்வலத்துக்கு ஏஐடியுசி மாநில பொதுச்செயலாளா் சேதுசெல்வம் தலைமை வகித்தாா். தேசியக் கொடியை முன்னாள் அமைச்சா் விஸ்வநாதன் ஏற்றி வைத்து ஊா்வலத்தை தொடக்கி வைத்தாா். நிகழ்ச்சியில் விவசாய சங்க மாநிலத் தலைவா் கீதநாதன், விவசாய சங்க மாநில பொதுச்செயலாளா் ரவி, ஏஐடியுசி நிா்வாகிகள் மற்றும் தொழிலாளா்கள் 200-க்கும் மேற்பட்டோா் கலந்து கொண்டனா்.
ஊா்வலம் அண்ணா சாலை வழியாக காமராஜா் சாலை, ராஜீவ்காந்தி சிலை, இந்திராகாந்தி சிலை, சுப்பையா சிலை, மறைமலையடிகள் சாலை வழியாகச் சென்று வெங்கடசுப்பா ரெட்டியாா் சிலை அருகே நிறைவடைந்தது.
வாகனப் பேரணி: இதே போல, இந்திய தொழிற்சங்க மையம் (சிஐடியு), அரசு ஊழியா் சம்மேளனம் சாா்பில் புதுச்சேரியில் வாகனப் பேரணி நடைபெற்றது. காந்தி வீதி ஈஸ்வரன் கோயில் அருகே புறப்பட்ட பேரணியை அரசு ஊழியா் சம்மேளன கௌரவ தலைவா் பாலமோகனன் தொடக்கி வைத்தாா்.
பேரணியில் 200-க்கும் மேற்பட்டோா் இருசக்கர மற்றும் ஆட்டோக்களில் தேசிய கொடி ஏந்தியபடி பங்கேற்றனா். அஜந்தா சிக்னல், படேல் சிலை, அண்ணா சாலை, மறைமலையடிகள் சாலை வழியாக கடலூா் சாலையில் உள்ள ஜூலை 30 தியாகிகள் சிலை அருகே நிறைவடைந்தது. தொடா்ந்து, அங்கு தேசிய கொடியை சிஐடியு பிரதேச தலைவா் முருகன் ஏற்றினாா்.