தனியாா் மருத்துவமனையில் மருத்துவரின் தங்க வளையல்கள் திருட்டு

புதுச்சேரி தனியாா் மருத்துவமனையில் பெண் மருத்துவரின் மூன்றரை பவுன் தங்க வளையல்கள் திருடப்பட்டது தொடா்பாக போலீஸாா் விசாரித்து வருகின்றனா்.

புதுச்சேரி மோந்தோா்சியே வீதியைச் சோ்ந்த காா்த்திக் ஆனந்தின் மனைவி மருத்துவா் ஸ்வரம்யா (33). இவா், காந்தி வீதியில் உள்ள தனியாா் மருத்துவமனையில் பணிபுரிந்து வருகிறாா்.

ஸ்வரம்யா கடந்த சில நாள்களுக்கு முன்பு மருத்துவமனையில் பணியில் இருந்தபோது, நோயாளிக்கு அறுவைச் சிகிச்சை மேற்கொள்ள வேண்டியிருந்தது. இதற்காக, தனது கையில் அணிந்திருந்த மூன்றரை பவுன் தங்க வளையலை தனது மருத்துவ சட்டைப் பையில் வைத்துவிட்டு அறுவைச் சிகிச்சை செய்தாராம். பிறகு, சட்டையைக் கழற்றி அங்கேயே வைத்துவிட்டு வீட்டுக்கு சென்றுவிட்டாா்.

இதன்பிறகு, வளையல்களை தனது சட்டைப் பையில் வைத்தது நினைவுக்கு வந்ததால், மீண்டும் மருத்துவமனைக்கு வந்து பாா்த்தபோது, சட்டைப் பையிலிருந்த தங்க வளையல்கள் மாயமாகியிருந்தது தெரியவந்தது.

இதுகுறித்து ஒதியஞ்சாலை காவல் நிலையத்தில் மருத்துவா் ஸ்வரம்யா வியாழக்கிழமை அளித்த புகாரின்பேரில், போலீஸாா் வழக்குப் பதிந்து விசாரித்து வருகின்றனா்.