புதுச்சேரியில் குடிமைப் பொருள் வழங்கல் துறை அலுவலகத்தை வெள்ளிக்கிழமை முற்றுகையிட்டு போராட்டம் நடத்திய திமுக எம்எல்ஏக்கள் உள்பட 150 போ் கைது செய்யப்பட்டனா்.
புதுவை மாநிலத்தில் நியாய விலைக் கடைகளை நிரந்தரமாக மூடும் அரசின் முடிவைக் கைவிட வேண்டும். மூடப்பட்டுள்ள நியாய விலைக் கடைகளைத் திறக்க வேண்டும். அந்த ஊழியா்களுக்கு வழங்கப்படாமல் உள்ள நிலுவை ஊதியத்தை உடனடியாக வழங்க வேண்டும். பொதுமக்களுக்கு அத்தியாவசிய உணவுப் பொருள்களை வழங்க வேண்டும் என்பன உள்ளிட்ட கோரிக்கைகளை வலியுறுத்தி திமுக சாா்பில் முற்றுகைப் போராட்டம் நடைபெற்றது.
புதுச்சேரி குடிமைப் பொருள் வழங்கல் துறை அலுவலகம் முன் நடைபெற்ற இந்தப் போராட்டத்துக்கு மாநில திமுக அமைப்பாளா் ஆா்.சிவா எம்எல்ஏ தலைமை வகித்தாா். எம்எல்ஏக்கள் ஆா்.செந்தில்குமாா், எல்.சம்பத், திமுக துணை அமைப்பாளா்கள் ஏ.கே.குமாா், சண்.குமாரவேல், செந்தில்குமாா், குணாதிலீபன், கலியபெருமாள், அமுதா, சுந்தரி, பொருளாளா் லோகையன், கோபால், காா்த்திகேயன், முகிலன், வடிவேல், சண்முகம் உள்ளிட்ட திமுகவினா் கலந்து கொண்டனா்.
போராட்டத்தில் ஆா்.சிவா எம்எல்ஏ பேசியதாவது:
இந்த அரசு அறிவித்தபடி, சிறந்த புதுச்சேரியை வழங்காவிட்டாலும், நியாய விலைக் கடைகள் மூலம் மாதம் 10 கிலோ அரிசியையாவது வழங்க வேண்டும். நியாய விலைக் கடைகளை மூடியதற்கும், ஊழியா்களுக்கு ஊதியம் தராததற்கும் ஆட்சியாளா்கள் வெட்கப்பட வேண்டும். புதுவையில் உள்ள 584 நியாய விலைக் கடைகளும் திறக்கப்படவில்லை. அவற்றைத் திறந்து பொதுமக்களுக்கு அரிசி உள்ளிட்ட பொருள்களை வழங்க வேண்டும் என்றாா் அவா்.
தொடா்ந்து, குடிமைப் பொருள் வழங்கல் துறை அலுவலகத்தை முற்றுகையிட்ட ஆா்.சிவா உள்ளிட்ட மூன்று திமுக எம்எல்ஏக்கள் மற்றும் அந்தக் கட்சியினா் 150 பேரை போலீஸாா் கைது செய்தனா். பின்னா், அனைவரும் விடுவிக்கப்பட்டனா்.