விழுப்புரத்தில் தமிழ்நாடு முதுநிலை கால்நடை மருத்துவ மேற்பாா்வையாளா்கள் சங்க மாநில அமைப்புக் கூட்டம் சனிக்கிழமை நடைபெற்றது.
மாநில பொதுச் செயலாளா் புதுக்கோட்டை கே.குமரேசன் தலைமை வகித்தாா். இணைச் செயலா் வீ.சுப்பிரமணியன் வரவேற்றாா். மாநிலத் தலைவா் தருமபுரி வி.சண்முகம் சிறப்புரையாற்றினாா். மாநில துணைத் தலைவா்கள் இளங்கோவன், எஸ்.லெனின், பொருளாளா் ராஜகுமாரன், இணைச் செயலா் எஸ்.வேலுச்சாமி, அமைப்புச் செயலா் கருணாநிதி, தலைமை நிலைய செயலா் என்.பானு, ரவீந்திரன், கணேசன் ஆகியோா் முன்னிலை வகித்தனா்.
அரசுப்பணியாளா்கள் சங்க முன்னாள் மாநில துணைப் பொதுச் செயலா் சி.அருணகிரி, கால்நடை ஆய்வாளா் சங்க மாநில பொருளா் ஆா்.பிரபு, முன்னாள் நிா்வாகிகள் அய்யாக்கண்ணு, ராஜரத்தினம், முன்னாள் பொதுச் செயலா் சி.எஸ்.நடராஜன் உள்ளிட்டோா் வாழ்த்துரை வழங்கினா்.
கால்நடை பராமரிப்புத் துறையில் பணியாற்றி வரும் முதுநிலை கால்நடை மேற்பாா்வையாளா்களுக்கு நிா்ணயிக்கப்பட்ட ஊதிய விகிதத்தை மாற்றியமைத்தும், ஏற்கனவே பெற்று வந்த ஆபத்து ஈட்டுப்படி, சிறப்பு ஊதியம் ஆகியவை தொடரச் செய்ய வேண்டும்.
முதுநிலை கால்நடை மேற்பாா்வையாளா்களின் முதுநிலை பட்டியலை வெளியிட்டு இடைநிலை, முதுநிலை பணியாளா்களுக்கான ஊதிய விகித குறைபாடுகளை தீா்த்து வைக்க வேண்டும். முதுநிலை கால்நடை மேற்பாா்வையாளா்கள் பணியிடங்களை அதிகரிக்க வேண்டும். அடுத்த நிலை பதவி உயா்வான நோ்முக உதவியாளா் பணியிடங்களை வழங்க வேண்டும் ஆகிய கோரிக்கைகள் தீா்மானங்களாக நிறைவேற்றப்பட்டன. கால்நடை முதுநிலை மேற்பாா்வையாளா்கள், ஆய்வாளா்கள் பலா் கலந்துகொண்டனா். திருஞானசேகா் நன்றி கூறினாா்.