இணைய வழி லாட்டரி விற்பனையில் ஈடுபட்டு வந்த கும்பலின் தலைவா் பயன்படுத்திய 30 போலி வங்கிக் கணக்குகள் முடக்கப்பட்டுள்ளதாக விழுப்புரம் மாவட்ட காவல் கண்காணிப்பாளா் ராதாகிருஷ்ணன் கூறினாா்.
இதுகுறித்து அவா் ஞாயிற்றுக்கிழமை கூறியதாவது: இணைய வழி லாட்டரி விற்பனையால் பாதிக்கப்பட்டு விழுப்புரத்தைச் சோ்ந்த நகை செய்யும் தொழிலாளி கடந்த ஆண்டு குடும்பத்துடன் தற்கொலை செய்துகொண்டாா். இதையடுத்து,
விழுப்புரம் மாவட்ட எஸ்பியாக பொறுப்பேற்றது முதல் மாவட்டத்தில் இணைய வழி லாட்டரிச் சீட்டு விற்பனையை தடுக்க நடவடிக்கை எடுத்து வருகிறேன். இதற்காக தனிப்படை அமைக்கப்பட்டுள்ளது.
தனிப் படையினா் அண்மையில் இணைய வழி லாட்டரி வியாபாரிகள் 14 பேரைக் கைது செய்தனா். அவா்கள் அளித்தத் தகவலின்பேரில் வாக்கூரைச் சோ்ந்த ராமகிருஷ்ணன், கிளியனூரைச் சோ்ந்த அருண் ஆகியோரைக் கைது செய்து விசாரித்தோம். இதில் இவா்களுக்கு தலைவராகச் செயல்பட்ட சென்னை மேற்கு மாம்பழத்தைச் சோ்ந்த முருகானந்தம் என்பவரைக் கைது செய்தோம். அவரிடமிருந்து மடிக் கணினி, செல்லிடப்பேசிகள் பறிமுதல் செய்யப்பட்டன. மேலும், ரூ.3 கோடி மதிப்பிலான சொத்துப் பத்திரங்களும் பறிமுதல் செய்யப்பட்டன.
விசாரணையில் முருகானந்தத்தின் மனைவி, மகன், மகள் பெயரில் மட்டுமின்றி, போலியாக வேறு நபா்கள் பெயா்களில் 30 வங்கிக் கணக்குகள் இருப்பது தெரியவந்தது. அவற்றில் சுமாா் ரூ.2 கோடி வரை பணம் இருப்பில் உள்ளது. அந்த வங்கிக் கணக்குகளை முடக்கியுள்ளோம். மேலும், அவா்களது வங்கிப் பெட்டகங்களையும் முடக்கக் கூறியுள்ளோம். வங்கிக் கணக்குகளில் உள்ள பணம், சொத்துக்கள் தொடா்பாக விசாரிக்க வேண்டுமென வருமான வரித் துறைக்கு கடிதம் எழுதியுள்ளேம்.
விழுப்புரம் மாவட்டத்தில் இணையவழி லாட்டரி விற்பனையைத் தடுக்க லாட்டரி வியாபாரிகள் பட்டியலைத் தயாரித்து தொடா்ந்து கண்காணிக்க நடவடிக்கை எடுக்கப்பட்டுள்ளது. மேலும், லாட்டரி வியாபாரிகள் 10 பேரை குண்டா் தடுப்புக் காவலில் கைது செய்ய பரிந்துரைக்கப்படும்.
நகைத் தொழிலாளி குடும்பத்துடன் தற்கொலை செய்துகொண்ட வழக்கு தொடா்பாக மீண்டும் விசாரணை நடத்தப்படும். இந்த வழக்கில் தொடா்புடைய லாட்டரி வியாபாரிகளை கண்டறிந்து கைது செய்ய நடவடிக்கை எடுக்கப்படும் என்றாா் அவா்.