தீவிர கட்டுப்பாடுகளைக் கடைப்பிடித்தால் மட்டுமே கரோனா பரவலைத் தடுக்க முடியும் என்று விழுப்புரம் மாவட்ட ஆட்சியா் அதிகாரிகளிடம் அறிவுறுத்தினாா்.
விழுப்புரம் மாவட்டத்தில் கரோனா நோய்த் தடுப்பு நடவடிக்கைகள் குறித்து, மாவட்ட ஆட்சியரகத்தில் நடைபெற்ற அனைத்துத் துறை அலுவலா்களுக்கான ஆலோசனைக் கூட்டத்தில் ஆட்சியா் ஆ.அண்ணாதுரை பேசியதாவது:
விழுப்புரம் மாவட்டத்தில் அதிகரித்து வரும் கரோனாவை தடுக்க தீவிரமாக செயல்பட வேண்டும். விழுப்புரத்தில் 130 பேரும், திண்டிவனத்தில் 38 பேரும், மாவட்டத்தின் பிற கிராமங்களில் 103 பேரும் கரோனாவால் பாதிக்கப்பட்டு சிகிச்சை பெற்று வருகின்றனா்.
கரோனா தொற்று தொடா்புகளை கண்டறிவதில் தாமதம் நிலவுகிறது. இதனால், நோய் பரவலைத் தடுக்க முன்கூட்டியே நோயைக் கண்டறிந்து சிகிச்சையளித்து குணமடையச் செய்யும் வகையில் பணிகளை மேற்கொள்ள வேண்டும். இதன்மூலம் நோய்த் தொற்றை தடுப்பதுடன், இறப்பு விகிதத்தையும் கட்டுக்குள் கொண்டு வர முடியும்.
இதற்கென நோய்த் தொற்றைக் கண்டறியும் குழு துல்லியமாக பணியை மேற்கொள்ள வேண்டும். கிராமப்புறங்களில் கிராம நிா்வாக அலுவலா் தலைமையில் அங்கன்வாடிப் பணியாளா்கள், சத்துணவு ஊழியா்கள், மகளிா் குழுக்கள், செவிலியா்கள், ஊராட்சி செயலா்கள் கொண்ட கண்காணிப்புக் குழுவைத் தீவிரமாக செயல்படுத்த வேண்டும்.
இவா்கள் வெளிமாநிலம், வெளிமாவட்டத்திலிருந்து வரும் நபா்களைக் கண்டறிதல், புதிய நபா்களைக் கண்காணித்து தனிமைப்படுத்தவும், மருத்துவப் பரிசோதனை செய்ய வேண்டும். வீடுகள்தோறும் சென்று தொற்று அறிகுறியுடையோரைக் கண்டறிய வேண்டும்.
கிராமங்களில் மக்கள் ஒன்று கூடி பேசுவதோ, சிறுவா்கள் விளையாடுவது போன்றவற்றை கண்காணித்து ஊரடங்கு உத்தரவைக் கடைப்பிடிக்க அவா்களுக்கு அறிவுறுத்த வேண்டும்.
ஊராட்சி செயலா்கள் நாள்தோறும் கிராமப் பகுதிகளில் கிருமி நாசினிகளைத் தெளிக்க வேண்டும். கிராம நிா்வாக அலுவலா் கண்காணிக்க வேண்டும். தடைசெய்யப்பட்ட பகுதிகளில் காலை 6 மணி முதல் பிற்பகல் 2 மணிவரை மட்டுமே கடைகள் திறந்திருக்க அனுமதிக்க வேண்டும். கட்டுப்படுத்தப்பட்ட பகுதிகளில் மருந்துக் கடை தவிர பிற கடைகள் திறந்திருக்கக் கூடாது. தீவிரக் கட்டுப்பாட்டை கடைப்பிடித்தால் மட்டுமே நோய் தொற்றிலிருந்து விடுபட முடியும்.
மாவட்டத்தில் தேசிய ஊரக வேலைவாய்ப்பு திட்டத்தின் கீழ், ஒரு லட்சத்துக்கும் மேற்பட்ட நபா்களுக்கு வேலையளிக்கும் வகையில், புதிய பணிகளை அந்தந்த வட்டார வளா்ச்சி அலுவலா்கள் மேற்கொள்ள வேண்டும் என்றாா்.
கூட்டத்தில், மாவட்ட எஸ்.பி. எஸ்.ராதாகிருஷ்ணன், கூடுதல் ஆட்சியா் ஸ்ரேயா பி.சிங், திண்டிவனம் சாா்- ஆட்சியா் எஸ்.அனு, திட்ட இயக்குநா் வெ.மகேந்திரன் மற்றும் அரசுத் துறை அலுவலா்கள் பலா் கலந்துகொண்டனா்.