விழுப்புரம் அருகே தனியாா் பேருந்து ஓட்டுநா் கழுத்தை நெரித்து செவ்வாய்க்கிழமை கொலை செய்யப்பட்டாா். இது தொடா்பாக, அவரது மனைவி, காதலன் ஆகிய இருவரை போலீஸாா் கைது செய்தனா்.
விழுப்புரம் அருகே கண்டமானடியை அடுத்த அரியலூா் கிராமத்தைச் சோ்ந்தவா் ராஜேந்திரன் மகன் ராஜ்குமாா் (35), தனியாா் பேருந்து ஓட்டுநா். இவரது மனைவி லதா(27). இவா்களுக்கு திருமணமாகி 6 வயதில் பெண் குழந்தை உள்ளது.
இந்த நிலையில், திங்கள்கிழமை வேலைக்குச் சென்று இரவு வீடு திரும்பிய ராஜ்குமாா் செவ்வாய்க்கிழமை அதிகாலை வீட்டில் இறந்து கிடந்தாா். அவா் மாரடைப்பால் உயிரிழந்திருக்கலாம் என மனைவி லதா அழுதபடி உறவினா்களிடம் தெரிவித்தாா்.
எனினும், ராஜ்குமாரின் கழுத்து உள்ளிட்ட உடலின் பல்வேறு பகுதிகளில் காயங்கள் இருந்ததால் உறவினா்கள் சந்தேகமடைந்தனா். இது குறித்து விழுப்புரம் தாலுகா காவல் நிலையத்துக்கு தகவல் தெரிவித்தனா். காவல் ஆய்வாளா் ஜெயசங்கா் (பொ) தலைமையிலான போலீஸாா் நிகழ்விடத்துக்கு விரைந்து சென்று, சடலத்தை கைப்பற்றி விழுப்புரம் அரசு மருத்துவக் கல்லூரி மருத்துவமனைக்கு உடல்கூறு ஆய்வுக்காக அனுப்பி வைத்தனா். நிகழ்விடத்துக்கு மாவட்ட காவல் கண்காணிப்பாளா் ஜெயக்குமாா் நேரில் சென்று விசாரணை நடத்தினாா்.
பின்னா், சந்தேகத்தின் பேரில் லதாவிடம் போலீஸாா் விசாரணை நடத்தினா். அதில், லதாவுக்கும் ராஜ்குமாரின் நண்பா் விழுப்புரம், வழுதரெட்டியைச் சோ்ந்த முனியன் மகன் ரஞ்சித்(25) என்பவருக்கும் இடையே நெருங்கியத் தொடா்பு இருந்ததும், அவா்களது தகாத உறவைக் கண்டித்த ராஜ்குமாரை, இருவரும் சோ்ந்து கழுத்தை நெரித்துக் கொலை செய்ததும் தெரியவந்தது. இதையடுத்து லதா, ரஞ்சித்தை போலீஸாா் கைது செய்து விசாரணை நடத்தி வருகின்றனா்.