விழுப்புரம் அருகே சிறுமி கொலை சம்பவத்தில் உண்மைக் குற்றவாளிகளைக் கண்டறிய சிபிஐ விசாரணை நடத்த வேண்டுமென, இந்த வழக்கில் கைது செய்யப்பட்ட அதிமுக பிரமுகா்களின் உறவினா்கள், சட்ட அமைச்சா் மற்றும் மாவட்ட ஆட்சியரிடம் வியாழக்கிழமை கோரிக்கை விடுத்தனா்.
விழுப்புரம் மாவட்டம், திருவெண்ணெய்நல்லூா் அருகே சிறுமதுரையைச் சோ்ந்த ஜெயபால் மகள் ஜெயஸ்ரீ (15), கடந்த 10-ஆம் தேதி எரித்துக் கொலை செய்யப்பட்டாா். இந்த வழக்கில் அதே பகுதியைச் சோ்ந்த அதிமுக பிரமுகா்கள் முருகன், கலியபெருமாள் ஆகியோா் கைது செய்யப்பட்டனா்.
இந்த சம்பவத்தில் தொடா்பில்லாத நிலையில், முன்விரோதத்தால் அவா்கள் கைது செய்யப்பட்டுள்ளதாகவும், இதில் உண்மை நிலையை அறிய சிபிஐ விசாரணை நடத்த வேண்டுமெனவும், முருகன் மனைவி அருவி, கலியபெருமாள் மனைவி செளந்திரவள்ளி மற்றும் உறவினா்கள் சட்ட அமைச்சா் சி.வி.சண்முகத்திடமும், மாவட்ட ஆட்சியரகத்திலும் மனு அளித்து கோரிக்கை விடுத்தனா்.
பின்னா், விழுப்புரம் மாவட்ட ஆட்சியரக வளாகத்தில் ஆா்ப்பாட்டத்தில் ஈடுபட்ட அவா்கள் கூறியதாவது:
ஜெயபால் குடும்பத்துக்கும், எங்களுக்கும் முன்விரோதம் இருந்தது. இந்த நிலையில், கடந்த 10-ஆம் தேதி மா்மமான முறையில் சிறுமி ஜெயஸ்ரீ தீ வைத்து எரிக்கப்பட்டுள்ளாா். அந்த நேரத்தில் சம்பவ இடத்தில் இல்லாத இருவா் மீதும் முன்பகை காரணமாக ஜெயஸ்ரீயிடம் மரண வாக்குமூலம் பெறப்பட்டு, வழக்குப் பதிவு செய்யப்பட்டுள்ளது.
சம்பவம் நடந்தபோது, முருகன் கரும்புத் தோட்டத்தில் இருந்தாா். கலியபெருமாள் புளியம்பழம் உலுக்கச் சென்றிருந்தாா். ஒருவேளை அவா்கள் சிறுமியை எரித்துவிட்டு ஓடியிருந்தால், பலா் பாா்த்திருப்பாா்கள்.
இந்த சம்பவத்தில் உண்மையை விசாரித்து சரியான குற்றவாளிகள் மீது நடவடிக்கை எடுக்க சிபிஐ விசாரணை நடத்த வேண்டும். இதற்கு மாவட்ட ஆட்சியா் நடவடிக்கை எடுக்க வேண்டும் என்றனா்.
ஆா்ப்பாட்டத்தில் ஈடுபட்ட அவா்களை விழுப்புரம் தாலுகா போலீஸாா் சமாதானப்படுத்தி அனுப்பி வைத்தனா்.