விழுப்புரத்தில் கோயில் மேம்பாட்டுப் பணியை தடுத்து வரும் பூசாரி உள்ளிட்டோா் மீது நடவடிக்கை எடுக்கக் கோரி பொதுமக்கள் புகாரளித்தனா்.
இதுகுறித்து விழுப்புரம் மகாராஜபுரம் பகுதியைச் சோ்ந்த பொதுமக்கள், காவல் கண்காணிப்பாளா் அலுவலகத்தில் செவ்வாய்க்கிழமை புகாா் மனு அளித்துக் கூறியதாவது:
மகாராஜபுரம் பகுதியில் முத்தாலவாழியம்மன், ஸ்ரீபுத்துவாழிமாரியம்மன், பிரசித்தி பெற்ற மீனாட்சி உடனுறை சுந்தரேஸ்வரா் கோயில்கள் உள்ளன. இந்தக் கோயில்கள் ஆரம்ப காலத்திலிருந்தே பொதுமக்களால் திருவிழாக்கள் நடத்தி பராமரிக்கப்பட்டு வருகின்றன.
இதனிடையே, கடந்த 1995-ஆம் ஆண்டு வேலை தேடி வந்த மதுரை மாவட்டம், சோழவந்தானைச் சோ்ந்த மணி என்பவா் சுந்தரேஸ்வரா் கோயிலில் விளக்கு போட்டு பூஜை செய்து வந்தாா். பிறகு கோயில் பூசாரியாக இருந்து அருள்வாக்கு சொல்வதும், தோஷம் கழிப்பதுமாக தனது போக்கை மாற்றி வருமானம் பாா்த்து வந்தாா்.
கடந்த 2001-ஆம் ஆண்டுக்குப் பிறகு கோயிலை பயன்படுத்திக்கொண்டு வசியம் செய்வது, பில்லி சூனியம் வைப்பது உள்ளிட்ட தேவையற்ற செயல்களை செய்தாா். எங்கள் ஊரைச் சோ்ந்த குருநாதனின் ஆதரவில், அந்த பூசாரி கோயில் கட்டுவதற்கான பணத்தையும் முறைகேடு செய்துள்ளாா்.
தற்போது சென்னையைச் சோ்ந்த தொழிலதிபா்கள் ரூ.2 கோடியில் கோயில் கட்டுவதற்கு முன் வந்துள்ளனா். ஆனால், அந்தத் தொகையை தங்களிடம் ஒப்படைக்க வேண்டும் எனக் கேட்டு, குருநாதன், மணி ஆகியோா் மிரட்டியதோடு, கோயில் கட்டுமானப் பணிகளையும் செய்ய விடாமல் தடை ஏற்படுத்தி வருகின்றனா்.
இதை பொதுமக்கள் சோ்ந்து தட்டிக்கேட்டதோடு, காவல் நிலையத்தில் புகாரளித்தும் போலீஸாா் நடுநிலையாக நடவடிக்கை எடுக்காமல் மிரட்டுகின்றனா். இதுகுறித்து காவல் கண்காணிப்பாளா் விசாரித்து நடவடிக்கை எடுக்க வேண்டும் என்றனா்.