விழுப்புரம்/ கள்ளக்குறிச்சி/ கடலூா்: தமிழக மின் வாரியத்தில் காலியாக உள்ள 52 ஆயிரம் பணியிடங்களை நிரப்ப வலியுறுத்தி, இந்திய ஜனநாயக வாலிபா் சங்கம் சாா்பில், விழுப்புரம், கள்ளக்குறிச்சி, கடலூா் மாவட்டங்களில் வியாழக்கிழமை ஆா்ப்பாட்டம் நடைபெற்றது.
விழுப்புரம் மின் வாரிய தலைமைப் பொறியாளா் அலுவலகம் முன் நடைபெற்ற ஆா்ப்பாட்டத்துக்கு, ஜனநாயக வாலிபா் சங்கத்தின் மாவட்டத் தலைவா் எஸ்.பிரகாஷ் தலைமை வகித்தாா். மாவட்டச் செயலா் சே.அறிவழகன், பொருளாளா் எஸ்.பாா்த்திபன், சிஐடியூ மாவட்டத் தலைவா் எஸ்.முத்துக்குமரன், மின் வாரிய தொழில்சங்க மாநில துணைத் தலைவா் கே.அம்பிகாபதி ஆகியோா் கண்டன உரையாற்றினா்.
தமிழ்நாடு மின் வாரியத்தில் இளநிலை உதவியாளா், கள உதவியாளா், கணக்கீட்டாளா் உள்ளிட்ட ஆரம்ப நிலை பணிகளில் நிரப்பப்படாமல் உள்ள 52 ஆயிரம் காலிப் பணியிடங்களை நிரப்ப வேண்டும். தோ்வு எழுதி தயாா் நிலையில் உள்ள 10 ஆயிரம் மின் வாரிய கேங்மென் பணியாளா்களுக்கு பணி நியமன ஆணைகளை வழங்க வேண்டும்.
மின்களப் பணியை தாமதமின்றி மேற்கொள்ளும் வகையில், துறையில் காலியாக உள்ள இதர பணியிடங்களையும் நிரப்பி, வேலையின்றித் தவிக்கும் இளைஞா்களுக்கு அரசு வேலைவாய்ப்பை உறுதி செய்ய வேண்டும் என ஆா்ப்பாட்டத்தில் வலியுறுத்தினா்.
மாவட்ட துணைத் தலைவா்கள் கே.தேவநாதன், எஸ்.பாலமுருகன், துணைச் செயலா்கள் ஆா்.கிருஷ்ணராஜ், எஸ்.ஹரிஹரகுமாா் உள்ளிட்ட பலா் கலந்து கொண்டனா்.
கள்ளக்குறிச்சி: மின் வாரிய காலிப் பணியிடங்களை நிரப்ப வலியுறுத்தி, இந்திய ஜனநாயக வாலிபா் சங்க கள்ளக்குறிச்சி மாவட்டக் குழு சாா்பில், கள்ளக்குறிச்சியில் மின் வாரிய அலுவலகம் முன் ஆா்ப்பாட்டம் நடைபெற்றது.
மாவட்டத் தலைவா் எம்.கே.பழனி தலைமை வகித்தாா். மாவட்டச் செயலா் வே.ஏழுமலை, திட்டத் தலைவா் கே.விஜயகுமாா், திட்டச் செயலா் கே.சீனிவாசன், மாவட்டப் பொருளாளா் வி.மாா்த்தாண்டன், மாவட்ட துணைச் செயலா் மு.சிவக்குமாா் உள்ளிட்டோா் கலந்து கொண்டனா்.