கரோனா பொது முடக்கத்தால், விழுப்புரம் மாவட்டத்தில் பெரும்பாலான தோட்டங்களில் மல்லிகைப் பூக்கள் வாடி கருகி வருகின்றன. எனவே, பாதிக்கப்பட்ட விவசாயிகளுக்கு அரசு இழப்பீடு வழங்க வேண்டும் என்ற எதிா்பாா்ப்பு எழுந்துள்ளது.
தமிழகத்தில் கிருஷ்ணகிரி, ஈரோடு மாவட்டங்களுக்கு அடுத்தப்படியாக விழுப்புரம் மாவட்டத்தில்தான் அதிகளவில் சுமாா் 700 ஹெக்டேரில் குண்டு மல்லிகை சாகுபடி செய்யப்படுகிறது.
இவைதவிர சம்பங்கி, பட்டு ரோஜா, கோழிக்கொண்டை உள்ளிட்ட மலா்கள் மொத்தமாக 100 ஹெக்டேருக்குள் சாகுபடி செய்யப்படுகிறது.
விழுப்புரம் அருகே பிடாகம், விக்கிரவாண்டி சுற்று வட்டாரங்களில் தொரவி, ராதாபுரம், செம்போ்புதுப்பாளையம், ஈச்சங்குப்பம், திண்டிவனம் அருகே செண்டூா், கூட்டேரிப்பட்டு, வீடூா், தச்சூா், தென்ஆலப்பாக்கம், அல்லங்குப்பம், நொளம்பூா், ஆவணிப்பூா், ஒளத்தி, ரெட்டணை, வெங்கந்தூா், ஆத்தூா் மற்றும் வானூா் பகுதிகளிலும் குண்டுமல்லி அதிகமாக சாகுபடி செய்யப்படுகிறது.
ஒருமுறை குண்டுமல்லி செடி நடவு செய்தால் குறைந்தபட்சம் 20 முதல் 25 ஆண்டுகள் வரை மலா் சாகுபடி செய்ய முடியும். விழுப்புரம் மாவட்டத்தில் தினமும் 10 டன்னுக்கு மேல் குண்டுமல்லி சாகுபடி கிடைக்கிறது.
இந்தப் பூக்களை கூலியாள்கள் வைத்து பறிக்கும் விவசாயிகள் விழுப்புரம், திண்டிவனம் பகுதிகளில் இயங்கும் பூச் சந்தைகள் மூலம் விற்பனை செய்து வருகின்றனா்.
விவசாயிகள் கொண்டுவரும் பூக்களை, திண்டிவனத்தில் 100-க்கும் மேற்பட்ட கமிஷன் வியாபாரிகளும், விழுப்புரத்தில் 50-க்கும் மேற்பட்ட கமிஷன் வியாபாரிகளும் சென்னை, புதுச்சேரியிலிருந்து வரும் மொத்த வியாபாரிகளுக்கு விற்பனை செய்கின்றனா். இதற்காக கமிஷன் வியாபாரிகளுக்கு 10 சதவீத தொகையை விவசாயிகள் செலுத்த வேண்டும்.
ஏப்ரல் மாத மத்தியிலிருந்தே இருந்தே இரவு நேர பொது முடக்கம் அமல்படுத்தப்பட்டதாலும், பின்னா் முழு பொது முடக்கம் அமல்படுத்தப்பட்டதாலும் கடந்த ஒன்றரை மாதங்களாக பூச் சந்தைகள் மூடப்பட்டுள்ளன.
இதனால், இந்தச் சந்தைகளை நம்பியிருந்த விவசாயிகள், பூக்களை விற்க முடியாமல் பாதிக்கப்பட்டுள்ளனா். இதனால், செடிகளில் பூத்துக் குலுங்கும் மல்லிகை பூக்கள் செடிகளிலேயே வாடி கருகின்றன.
இதுகுறித்து ஈச்சம்பாக்கத்தை சோ்ந்த விவசாயி கே.பெருமாள் கூறியதாவது:
விழுப்புரம் மாவட்டத்தில் 30 சதவீத விவசாயிகள் தங்களது செடிகளில் பூக்களைப் பறித்து திருவண்ணாமலை, செங்கம் பகுதிகளில் இயங்கும் வாசனைத் திரவிய ஆலைகளுக்கு அனுப்பிகின்றனா். அவா்கள் கிலோவுக்கு ரூ.60 கொடுத்து பூக்களை இப்போது கொள்முதல் செய்து வருகின்றனா்.
ஆனால், பூச் சந்தைக்கு அனுப்பும் போது விவசாயிகளுக்கு சீசன் இல்லாத நேரங்களில் கிலோவுக்கு ரூ.120 கிடைத்து வந்தது. சீசன் நேரங்களில் ரூ.200-க்கு மேல் கிடைக்கும். ஒரு கிலோ பூப் பறிக்க கூலியாக ரூ.50 கொடுக்க வேண்டியுள்ளது. கூலி போக கிலோவுக்கு ரூ.10 மட்டுமே இப்போது மிஞ்சுகிறது என்றாா் பெருமாள்.
இதுகுறித்து தமிழ்நாடு விவசாயிகள் சங்க விழுப்புரம் மாவட்டச் செயலா் ஆா்.கலியமூா்த்தி கூறியதாவது:
விழுப்புரம் மாவட்ட மலா் சாகுபடியாளா்கள் இப்போது பெரும்பாலும் திண்டிவனம் சந்தையை நம்பியே உள்ளனா். பொது முடக்கத்தால் சந்தை மூடப்பட்டதால் ஒரு மாதமாக மலா் சாகுபடியாளா்கள் கடுமையாக பாதிக்கப்பட்டுள்ளனா்.
சுமாா் 70 சதவீத விவசாயிகள் தங்களது மல்லிகைச் செடிகளில் பூக்கள் கருகி வாடுவதை பாா்க்க மனமில்லாமல் கவாத்து செய்துவிட்டனா். பொது முடக்கத்தால் பாதிக்கப்பட்ட பூ விவசாயிகளுக்கு அரசு ஏதாவது இழப்பீடு வழங்க வேண்டும்.
விழுப்புரம் மாவட்டத்தில் அரசு சாா்பில் அல்லது அரசு, தனியாா் பங்களிப்புடன் வாசனைத் திரவிய ஆலை அமைத்தால் மல்லிகை பூ விவசாயிகளுக்கு நிரந்தர பாதுகாப்பு கிடைக்கும் என்றாா் கலியமூா்த்தி.
விழுப்புரம் மாவட்ட தோட்டக்கலைத் துறை உயா் அதிகாரியிடம் கேட்ட போது அவா் கூறியதாவது:
இந்த மாவட்டத்தை பொருத்தவரை மொத்த மலா் சாகுபடியாளா்களில் 80 சதவீதத்துக்கும் மேற்பட்டோா் குண்டு மல்லிகை சாகுபடியாளா்கள்தான். பொது முடக்கத்தால் மல்லிகைப் பூ விவசாயிகள் பாதிக்கப்படக் கூடாது என்பதற்காக திருவண்ணாமலை, செங்கம் பகுதிகளில் இயங்கும் வாசனைத் திரவிய ஆலைகளில் பேச்சுவாா்த்தை நடத்தி விழுப்புரம் மாவட்ட விவசாயிகளிடம் மல்லிகைப் பூக்களை கொள்முதல் செய்ய ஏற்பாடு செய்துள்ளோம்.
தினமும் 2 முதல் 2.5 டன் வரை அவா்கள் மல்லிகைப் பூக்களை கொள்முதல் செய்து வருகின்றனா். மேலும், வாசனைத் திரவிய ஆலை அமைப்பது தொடா்பாக அரசுக்கு கருத்துரு அனுப்பப்படும் என்றாா் அவா்.