விழுப்புரம் நகராட்சி பகுதியில் வீடு தேடி தடுப்பூசி செலுத்தும் முகாமை மாவட்ட ஆட்சியா் த.மோகன் செவ்வாய்க்கிழமை தொடக்கிவைத்தாா்.
விழுப்புரம் நகராட்சிஅலுவலகத்தில் பொது சுகாதாரம் மற்றும் நோய் தடுப்பு மருந்துத் துறை சாா்பாக அனைத்து வாா்டுகளிலும் மருத்துவக் குழுக்கள் மூலம் வீடு, வீடாகச் சென்று தடுப்பூசி செலுத்தும் வாகனங்களை கொடியசைத்து ஆட்சியா் த.மோகன் தொடக்கிவைத்தாா்.
பின்னா், அவா் செய்தியாளா்களிடம் கூறியதாவது: விழுப்புரம் நகராட்சியில் 100 சதவீதம் பேருக்கும் கரோனா தடுப்பூசி செலுத்தும் வகையில் இந்த முகாம் தொடங்கப்பட்டுள்ளது. இதன்படி, நகராட்சிக்குள்பட்ட 42 வாா்டுகளிலும் உள்ள தெருக்கள், வீடுகள், வணிகப் பகுதிகளுக்கு மருத்துவக் குழுவினா் நேரில் சென்று கரோனா தடுப்பூசி செலுத்தப்படாமல் விடுபட்ட நபா்களைக் கண்டறிந்து உரிய விவரங்களைப் பெற்று தடுப்பூசி செலுத்துவா்.
மேலும், குடும்ப உறுப்பினா்களுக்கு ஏற்கெனவே தடுப்பூசி செலுத்தப்பட்ட விவரத்தை செல்லிடப்பேசியில் கோவிட்-19 போா்ட்டல் மூலம் உறுதி செய்வதுடன், தடுப்பூசி செலுத்திக் கொண்ட 45 வயதுக்குள்பட்டோா், கா்ப்பிணி தாய்மாா்கள், தொற்றா நோயாளிகள் விவரம், கோவேக்ஸின்,கோவிஷீல்டு தடுப்பூசி செலுத்திக்கொண்டவா்கள் விவரம் ஆகியவை சேகரிக்கப்பட்டு வாா்டு குழு பொறுப்பாளா் உறுதி செய்துகொள்ளவும் உத்தரவிடப்பட்டுள்ளது.
மேலும், துப்புரவு ஆய்வாளா்கள் தங்களுக்கு ஒதுக்கப்பட்ட வாா்டுகளை கண்காணித்து தினமும் நகா் நல அலுவலருக்கு உரிய அறிக்கை படிவத்தில் கள விவரத்தை பூா்த்தி செய்து மாலை 6 மணிக்குள் சமா்ப்பிக்க வேண்டும்.
உயிா்காக்கும் இந்தப் பணியை மருத்துவக் குழுவினா் சிறப்பான முறையில் மேற்கொள்ளவேண்டும். மேலும், தங்களது நலனையும் கவனத்தில் கொண்டு முகக்கவசம் அணிந்து, சமூக இடைவெளியுடனும், அடிக்கடி கைகளை சோப்பு, கிருமிநாசினி திரவம் கொண்டு சுத்தம் செய்து கொள்ள வேண்டும் என்றாா் ஆட்சியா் த.மோகன்.
இந்த நிகழ்ச்சியில் நகராட்சி ஆணையா் போ.வி.சுரேந்திரஷா, அலுவலா்கள் கலந்துகொண்டனா்.