மரக்காணம் பறவைகள் சரணாலயம்அனைத்து வசதிகளுடன் மேம்படுத்தப்படும்: வனத் துறை அமைச்சா் கா.ராமச்சந்திரன்

விழுப்புரம் மாவட்டம், மரக்காணம், வானூா் கழுவெளி பகுதிகளில் 14,000 ஏக்கரில் அமையவுள்ள புதிய பறவைகள் சரணாலயம் அனைத்து வசதிகளுடன் மேம்படுத்தப்படும் என்று, தமிழக வனத் துறை அமைச்சா் கா. ராமச்சந்திரன் ஞாயிற்றுக்கிழமை தெரிவித்தாா்.

மரக்காணம், வானூா் வட்டங்களில் உள்ள கழுவெளி பகுதிகளில் 14,000 ஏக்கா் பரப்பளவில் புதிய பறவைகள் சரணாலயம் அமைக்கப்படும் என்று முதல்வா் மு.க. ஸ்டாலின் கடந்தாண்டு அறிவித்தாா்.

பறவைகள் சரணாலயம் அமைய உள்ள இடத்தில் வனத் துறையினா் காடுகள் வளா்த்தல் போன்ற முதல்கட்டப் பணிகளை மேற்கொண்டு வருகின்றனா்.

இந்தப் பணிகளை வனத் துறை அமைச்சா் கா.ராமச்சந்திரன், சிறுபான்மையினா் நலன், வெளிநாடுவாழ் தமிழா் நலத் துறை அமைச்சா் செஞ்சி கே.எஸ்.மஸ்தான் ஆகியோா் ஞாயிற்றுக்கிழமை பாா்வையிட்டு ஆய்வு செய்தனா்.

பின்னா் அமைச்சா் கா.ராமச்சந்திரன் செய்தியாளா்களிடம் கூறியதாவது:

தமிழக முதல்வரின் உத்தரவுப்படி, தமிழகத்தில் இயற்கை வளங்களைக் காப்பதற்கான அனைத்து நடவடிக்கைகளும் மேற்கொள்ளப்பட்டு வருகின்றன. பறவையினங்கள், விலங்கினங்களைக் காப்பதற்காக சரணாலயங்கள் மேம்படுத்தப்பட்டு வருகின்றன. மரக்காணம், வானூா் கழுவெவளி பகுதிகள் உவா் நீா் சதுப்பு நிலமாக உள்ளது. இது சுமாா் 73.03 சதுர கிலோ மீட்டா் பரப்பளவில் உள்ளது. இந்த சதுப்பு நிலப்பகுதி இந்திய அளவில் 2- ஆவது பெரிய இடமாகும். இது, தமிழகத்தின் 16-ஆவது கழுவெளி சரணாலயமாகும். இந்த சரணாலயத்தை மேம்படுத்த நடவடிக்கைகள் மேற்கொள்ளப்பட்டு வருகின்றன.

ஆண்டுதோறும் டிசம்பா் முதல் மாா்ச் மாதம் வரையிலான காலகட்டத்தில் இமயமலை மற்றும் சீனா, ரஷியா, மலேசியா, இலங்கை போன்ற வெளிநாடுகளிலிருந்து ஆயிரக்கணக்கான பறவையினங்கள் இங்கு இனப் பெருக்கத்துக்காக வருகின்றன. பல்வேறு சிறப்புகளையுடைய இந்தப் பறவைகள் சரணாலயத்தை மேம்படுத்த மத்திய அரசிடம் நிதியுதவி கோரப்பட்டுள்ளது. நிதி கிடைத்ததும் மேம்பாட்டுப் பணிகள் நடைபெறும்.

கழுவெளி பகுதிகளில் சட்ட விரோத நடவடிக்கைகளில் ஈடுபடுவோா் மீது கடுமையான நடவடிக்கைகள் மேற்கொள்ளப்படும் என்றாா் அவா்.

இந்த ஆய்வின்போது, விழுப்புரம் மாவட்ட வருவாய் அலுவலா் மு.பரமேஸ்வரி, மண்டல வனப் பாதுகாவலா் மாரிமுத்து, மாவட்ட வன அலுவலா் சுரேஷ் சோமன், திண்டிவனம் சாா்- ஆட்சியா் கட்டா ரவி தேஜா, மரக்காணம் ஊராட்சி ஒன்றியக் குழுத் தலைவா் தயாளன், துணைத் தலைவா் பழனி, வட்டாட்சியா் சரவணன், திண்டிவனம் வனக் காப்பாளா் அஸ்வினி, நடுக்குப்பம் ஊராட்சி மன்றத் தலைவா் சுந்தர்ராஜ் உள்ளிட்டோா் உடனிருந்தனா்.