ரஜினியின் ‘கபாலி’ படத்துக்கு இசை வெளியீட்டு விழா கிடையாது!

ரஜினி நடிப்பில் உருவாகி வரும் கபாலி படத்துக்கு இசை வெளியீட்டு விழா எதுவும் நடைபெறாது என்று தகவல் தெரிவிக்கப்பட்டுள்ளது.

லிங்கா படத்தையடுத்து ரஜினி நடிப்பில் உருவாகி வரும் படம் கபாலி. கலைப்புலி எஸ்.தாணு தயாரிக்கும் இந்தப் படத்தை அட்டக்கத்தி, மெட்ராஸ் ஆகிய படங்களை இயக்கிய பா.இரஞ்சித் இயக்குகிறார். ராதிகா ஆப்தே, தன்ஷிகா, அட்டக்கத்தி தினேஷ், கலையரசன் உள்ளிட்ட பலர் நடித்துள்ள இப்படத்துக்கு சந்தோஷ் நாராயணன் இசையமைத்துள்ளார்.

முரளி ஒளிப்பதிவில் பிரவீன் கே.எல். படத்தொகுப்பு செய்துள்ளார். சென்னையில் தொடங்கிய கபாலியின் படப்பிடிப்பு கோவா, மலேசியா, சிங்கப்பூர் என அடுத்தகட்ட படப்பிடிப்புகள் நடைபெற்று முடிவடைந்துள்ளது.

கபாலி படத்தின் "டீசர்' அண்மையில் வெளியாகி, உலகம் முழுவதும் ரசிகர்களின் ஏகோபித்த வரவேற்பைப் பெற்றது. இந்நிலையில், கபாலி படத்தின் பாடல்கள் ஜூன் 12 அன்று கபாலி பாடல்கள் வெளியாகும் என தயாரிப்பாளர் தாணு அறிவித்தார்.

கபாலி படத்துக்கு மிகப்பெரிய அளவில் இசைவெளியீட்டு விழா நடத்தப்படும் என்று அனைவரும் எதிர்பார்க்கப்பட்ட நிலையில் தற்போது எந்த விழாவும் கிடையாது. இணையம் வழியாகப் பாடல்கள் வெளியிடப்படும் என்கிற தகவல் கிடைத்துள்ளது.

ரஜினி தற்போது அமெரிக்காவில் விடுமுறையைக் கழித்துவருகிறார். ஜூன் 12 அன்று அவரால் சென்னைக்குத் திரும்பமுடியாது. அவர் இல்லாமல் பாடல்கள் வெளியீட்டு விழாவையும் நடத்தமுடியாது. அதனால் விழா எதுவுமின்றி இணையம் வழியாகப் பாடல் வெளியிடப்படுகிறது என்று படக்குழுவினர் தகவல் தெரிவித்துள்ளார்கள்.

மேலும் படம் ஜூலை 1 அன்று வெளியாகும் என எதிர்பார்க்கப்பட்டது. ஆனால் திட்டமிட்டப்படி அந்தத் தேதியில் வெளியாகாது என்றும் அறியப்படுகிறது.