விஷால் நடித்துள்ள சக்ரா படம் நேரடியாக ஓடிடியில் வெளியாகாது என்று தெரிவிக்கப்பட்டுள்ளது.
எம்.எஸ். ஆனந்தன் இயக்கத்தில் விஷால், ஷ்ரத்தா ஸ்ரீநாத் நடித்துள்ள படம் - சக்ரா. யுவன் சங்கர் ராஜா இசையமைத்துள்ள இந்தப் படத்தின் டிரெய்லர் தமிழ், தெலுங்கு, மலையாளம், கன்னடம் என நான்கு மொழிகளில் வெளியிடப்பட்டுள்ளது.
மே 1-ம் தேதி படம் வெளிவருவதாக இருந்த நிலையில் கரோனா ஊரடங்கு காரணமாக இதன் வெளியீடு ஒத்திவைக்கப்பட்டுள்ளது.
இந்நிலையில் சக்ரா படம் ஓடிடியில் நேரடியாக வெளியாகும் என ஒரு தகவல் வெளியானது. ஆனால் படக்குழு இதை மறுத்துள்ளது. இன்னும் 7 நாள் படப்பிடிப்பு மீதமுள்ளது. அரசு அனுமதி அளித்தவுடன் மீதமுள்ள காட்சிகள் படமாக்கப்படும். அக்காட்சிகளுக்குக் கூட்டமோ நிறைய நடிகர்களோ தேவையில்லை. அதிகப் பொருட்செலவில் சக்ரா படம் உருவாக்கப்பட்டுள்ளதால் ஓடிடியில் நேரடியாக வெளியாகாது. நிச்சயமாகத் திரையரங்குகளில் தான் வெளியாகும் என்று கூறப்பட்டுள்ளது.