ரஜினி நடிப்பில் பி.வாசு இயக்கத்தில் 2005-ல் வெளியாகி பெரிய அளவில் வெற்றி பெற்ற படம் - சந்திரமுகி. தற்போது இந்தப் படத்தின் 2-ம் பாகம் உருவாகவுள்ளது.
என்னுடைய அடுத்த படம், ரஜினி சாரின் சந்திரமுகி 2. அவருடைய சம்மதத்துடன் இந்தப் படத்தில் நடிக்கிறேன் என்று கடந்த மாதம் அறிவித்தார் ராகவா லாரன்ஸ். சன் டிவி தயாரிக்கும் இந்தப் படத்தை பி.வாசு இயக்குகிறார். 2017-ல் ராகவா லாரன்ஸ் நடித்த சிவலிங்கா படத்தை இயக்கினார் பி.வாசு. அதன்பிறகு அவர் இயக்கும் தமிழ்ப்படம் இது.
இந்நிலையில் சந்திரமுகி 2 படம் குறித்து ஜோதிகா ஒரு பேட்டியில் கூறியதாவது:
சந்திரமுகி 2 படத்தில் நான் நடிக்கிறேனா எனக் கேட்கிறீர்கள். சந்திரமுகி 2 படத்தில் நான் நடிக்கவில்லை என நினைக்கிறேன். எனக்கு எந்தவொரு தகவலும் இல்லை. அந்தப் படத்தில் நான் நடிக்கவேண்டும் என யாரும் கேட்கவில்லை என்றார்.
நீங்கள் நடிக்கவில்லை என்றால் வேறு யார் நடித்தால் நன்றாக இருக்கும் என்கிற கேள்விக்கு ஜோதிகா அளித்த பதில்: சந்திரமுகி 2 படத்தில் சிம்ரன் நடித்தால் நன்றாக இருக்கும் என்றார்.