பிரபல ஒளிப்பதிவாளர் சந்தோஷ் சிவன் இயக்கத்தில் மும்பைகர் என்கிற ஹிந்திப் படத்தில் விஜய் சேதுபதி நடிக்கிறார். இதன் அறிவிப்பு வெளியாகியுள்ளது.
லாபம், காத்துவாக்குல ரெண்டு காதல், துக்ளக் தர்பார், இயக்குநர் சுந்தர்ராஜனின் மகன் தீபக் சுந்தர்ராஜன் இயக்குநராக அறிமுகமாகும் படம், யாதும் ஊரே யாவரும் கேளிர் ஆகிய படங்களில் விஜய் சேதுபதி நடித்து வருகிறார். 19(1)(a) என்கிற மலையாளப் படத்திலும் நடித்து வருகிறார். இதுதவிர, விஜய் சேதுபதி நடிப்பில் உருவாகியுள்ள மாமனிதன், கடைசி விவசாயி, இடம் பொருள் ஏவல் ஆகிய படங்களின் வெளியீடு தாமதமாகியுள்ளது. ஷாஹித் கபூருடன் இணைந்து ஹிந்தி இணையத் தொடர் ஒன்றில் விஜய் சேதுபதி நடிக்கவுள்ளார். மணி ரத்னம் தயாரிப்பில் நெட்பிளிக்ஸில் வெளியாகவுள்ள நவரசா இணையத் தொடரிலும் நடித்துள்ளார்.
இந்நிலையில் ஹிந்தியிலும் அறிமுகமாகிறார் விஜய் சேதுபதி. லோகேஷ் கனகராஜ் இயக்கியுள்ள மாநகரம் படத்தின் ஹிந்தி ரீமேக், மும்பைகர் என்கிற பெயரில் பிரபல ஒளிப்பதிவாளர் சந்தோஷ் சிவன் இயக்கத்தில் உருவாகிறது. இதன் அறிவிப்பு இன்று வெளியாகியுள்ளது. விக்ராந்த் மஸ்ஸே, விஜய் சேதுபதி, ரன்வீர் ஷோரே, சஞ்சய் மிஷ்ரா, தன்யா மானிக்தலா, சச்சின் கடேகர் போன்றோர் நடிக்கிறார்கள்.