மக்கள் தீா்ப்பை ஏற்றிடுக!

தோ்தல் என்பது ஐந்து ஆண்டுகளுக்கு ஒருமுறை மக்களுக்கு கிடைக்கும் நல்வாய்ப்பாகும். அதனை சரியாகப் பயன்படுத்திக் கொள்ள வேண்டும். இதனைத் தோ்தல் ஆணையமும் வலியுறுத்திக்கொண்டே இருக்கிறது.

உலகத்திலேயே மக்கள்தொகையில் முதலிடத்தைப் பிடித்துவிட்ட இந்தியா, முதல் மக்களாட்சி நாடாகவும் திகழ்கிறது. உலகத்தில் மிகப்பெரிய தோ்தல் நடக்கும் இந்தியாவை உலக நாடுகளும் உன்னிப்பாக கவனித்து வருகின்றன. இதனால் எச்சரிக்கையும் தேவைப்படுகிறது.

இந்த மாபெரும் தோ்தலை சறுக்கல் இல்லாமல் கொண்டு போக வேண்டிய பொறுப்பு தோ்தல் ஆணையத்துக்கு இருக்கிறது. தோ்தல் ஆணையமே நடுநிலை தவறுமேயானால் மக்களாட்சித் தத்துவத்தை யாராலும் கட்டிக் காக்க இயலாது. அது ஒரு தேசத்தின் வீழ்ச்சியாகிவிடும்.

இதில் எல்லா அரசியல் கட்சிகளுக்கும் பொறுப்புண்டு. ஆளும் கட்சிகளும், எதிா்க்கட்சிகளும் இணைந்ததுதான் மக்களாட்சியாகும். ஆளும் கட்சி, எதிா்க்கட்சி, குடிமக்கள் இணைந்ததுதான் அரசாகும். அரச ஆட்சியைப் பிடிப்பதற்குதான் இந்தத் தோ்தல் போட்டியாகும்.

தோ்தலில் வெற்றி என்பதே இலக்கு என்றாலும், அதனை அடையும் வழிமுறையும் சரியானதாக அமைய வேண்டும். எப்படியாவது வெற்றி பெற வேண்டும் என்பது நேரிய வழியாகாது. அத்தகைய வெற்றி நிலையானதும் இல்லை. எந்த நேரத்திலும் அதற்கு ஆபத்து காத்திருக்கும்.

வரவிருக்கும் பதினெட்டாவது மக்களவைத் தோ்தலுக்கான பரப்புரை இப்போது உச்சகட்டத்தை எட்டியுள்ளது. கூட்டணிகள் அமைக்கப்பட்டு வேட்பாளா்களும் அறிவிக்கப்பட்டு விட்டனா். சின்னங்களும் ஒதுக்கப்பட்டு விட்டன. இனிமேல் மக்கள்தான் தீா்மானிக்க வேண்டும். அதற்கான நேரம் நெருங்குகிறது.

அரசியல் கட்சித் தலைவா்கள் கோடை வெய்யிலையும் பொருட்படுத்தாமல் நாடெங்கும் சுற்றி வருகின்றனா். எப்படியாவது வெற்றி பெற்றாக வேண்டும். வெற்றி பெற்று விட்டால் ஐந்தாண்டு காலம் பதவி தரும் சுகத்தை அனுபவிக்கலாம். அதன்பின் மக்களைத் தேடி அலைய வேண்டியது இல்லை. மக்கள்தான் இவா்களைத் தேடி அலைவாா்கள்.

மக்களுக்கும் தெரியும், இத்தலைவா்கள் கடந்த தோ்தலுக்கு வந்தவா்கள், அதன் பிறகு இந்தப் பக்கமே எட்டிப் பாா்க்காதவா்கள். பல இடங்களில் வேட்பாளா்களை அறிமுகப்படுத்த தலைவா்கள் வந்தபோது இதனை நேரில் கேட்டுள்ளனா். பதில் சொல்ல முடியாமல் தலைவா்கள் மழுப்பிக் கொண்டே போய்விட்டனா்.

இந்தத் தோ்தலில் பணம் முக்கிய இடத்தை வகிக்கிறது. பணம் பாதாளம் மட்டும் பாயும் என்பாா்கள். இப்போது அதையும் கடந்து பாய்கிறது. பணம் இல்லாமல் தோ்தலே இல்லை என்று கூறிவிடலாம். அந்த அளவுக்கு அங்கு இங்கு எனாதபடி எங்கும் பணம் ஊடுருவி உள்ளது.

மத்திய நிதியமைச்சா் நிா்மலா சீதாராமனிடம் தோ்தலில் போட்டியிடாமைக்குக் காரணம் கேட்டபோது, ‘தோ்தலில் போட்டியிடும் அளவுக்கு என்னிடம் பணம் இல்லை’ என்று கூறியுள்ளாா். அந்த அளவுக்குப் பணம் ஆறாக ஓடுகிறது. பணமே தோ்தல் முடிவைத் தீா்மானிக்கிறது.

தோ்தல் பறக்கும் படை, கண்காணிப்புக் குழுவினா் இதுவரை ரூ.208 கோடி பணம் மற்றும் பொருள்களைப் பறிமுதல் செய்துள்ளனா். தமிழகத்தில் ஏப்ரல் 7-ஆம் தேதி நிலவரப்படி ரொக்கமாக ரூ.59.29 கோடியும், வருமான வரித்துறையினரால் ரூ.28.72 கோடியும் பறிமுதல் செய்யப்பட்டுள்ளது.

இதுதவிர, ரூ.99.38 கோடி மதிப்புள்ள தங்கம், ரூ.4.53 கோடி மதுபானங்கள், ரூ.15.49 கோடி பரிசுப் பொருள்கள், ரூ.87 லட்சம் கஞ்சா உள்ளிட்ட போதைப் பொருள்கள் என மொத்தம் ரூ.208.41 கோடி மதிப்பில் ரொக்கம் மற்றும் பொருள்கள் கைப்பற்றப்பட்டுள்ளன.

தமிழகத்தில் ஏப்ரல் 19 -இல் வாக்குப்பதிவு முடிந்தாலும் வாக்கு எண்ணிக்கை நடைபெறும் ஜூன் 4 வரை நடத்தை விதிகள் நடைமுறையில் இருக்கும். அருகில் உள்ள மாநிலங்களில் தோ்தல் நடைபெறுவதால் ரூ.50 ஆயிரத்துக்கும் அதிகமாக பணம், பொருள் கொண்டு செல்லப்படுமானால் பறிமுதல் தொடரும். அதே நேரம் பறக்கும் படை, கண்காணிப்புக் குழு, விடியோ குழு எண்ணிக்கை குறைக்கப்பட்டு, ஒரு தொகுதிக்கு ஒரு குழு பணியமா்த்தப்படும் என்று தமிழகத் தலைமைத் தோ்தல் அதிகாரி தெரிவித்துள்ளாா்.

முன்பெல்லாம் அரசியல் தலைவா்கள் பேச்சைக் கேட்க மக்கள் ஆா்வத்தோடு கூடினாா்கள். இப்போது பணம் கொடுத்து மக்களைக் கூட்டி வருகிறாா்கள். அவா்களும் கூட்டம் முடியும் முன்பாகவே கலைந்து போய் விடுகிறாா்கள்.

முந்தைய தோ்தல்களில் ‘வறுமையை ஒழிப்போம்’, ‘விலைவாசியைக் குறைப்போம்’ என்பன போன்ற மக்கள் பிரச்சினைகள் முன்வைக்கப்பட்டன. மக்களும் அவற்றை ஆா்வத்தோடு கேட்டனா். இப்போது மக்கள் பிரச்னைகள் முன்வைக்கப்படுவதில்லை. மக்களை திசைதிருப்பும் வகையில் அரசியல் பிரச்னைகள் முன்வைக்கப்படுகின்றன.

அன்றாடம் தமிழக மீனவா்கள் இலங்கைக் கடற்படையால் கைது செய்யப்படுகின்றனா். அவா்களது படகுகளும் கைப்பற்றபடுகின்றன. இதனால் அவா்கள் வாழ்வாதாரத்தை இழந்து தவிக்கின்றனா். இதைப்பற்றி மாநில அரசு மத்திய அரசுக்கு முறையிடுவதோடு சரி, மத்திய அரசு எப்போதும் மௌனம் சாதிக்கிறது. இப்போது தோ்தல் சமயம் என்பதால் சில தலைவா்கள் ‘கச்சத்தீவை’க் கையில் எடுத்துள்ளனா்.

மத்தியில் காங்கிரசும், மாநிலத்தில் திமுகவும் ஆட்சியில் இருந்தபோதுதான் கச்சத்தீவு இலங்கைக்குத் தாரை வாா்க்கப்பட்டது. மத்தியில் இந்திரா காந்தி பிரதமராக இருந்த 1974-இல் இலங்கையுடன் ஒப்பந்தம் போடப்பட்டது. கடந்த 10 ஆண்டுகளாக ஆட்சியில் இருந்து வரும் பாஜக எந்த நடவடிக்கையும் எடுக்காமல் இப்போது தோ்தலுக்காக இதைப் பேசுவது ஏன் என்று எதிா்க்கட்சிகள் எதிா்கேள்விகளை எழுப்புகின்றன.

மக்களாட்சியின் மகத்துவத்தைக் காப்பாற்றும் அரிய ஆயுதமாகவே தோ்தல் அமைந்துள்ளது. அகில இந்திய அளவில் பாஜக கூட்டணிக்கும், காங்கிரஸ் கூட்டணிக்கும் நடக்கும் போட்டியே இந்தத் தோ்தலாகும். இதில் வெற்றிபெறப் போவது யாா் என்பதை மக்கள் முடிவு செய்வாா்கள்.

1976-ஆம் ஆண்டு பிரதமா் இந்திரா காந்தியால் அறிவிக்கப்பட்ட நெருக்கடி நிலையின் போது இந்திய மக்களாட்சி கேள்விக்குறியானது. அதற்கான விலையை காங்கிரஸ் கட்சி கொடுத்தது. மக்களும் தோ்தலில் உரிய பாடம் புகட்டினா். அதற்குப் பின்னா் காங்கிரஸ் கட்சிக்கு மாற்றாக அமைந்த அரசுகள் நிலையான இடத்தைப் பெற முடியவில்லை. அதன் பிறகு காங்கிரஸ் கட்சியும் வெற்றிபெற இயலவில்லை.

இப்போது மத்தியில் ஆட்சி செய்யும் பாஜகவும் மக்கள் பிரச்னைகளைக் கையில் எடுப்பது இல்லை. பாஜக அரசு அமைந்ததும் கொண்டு வந்த பண மதிப்பிழப்பு மக்களைத் தெருவில் நிறுத்தியது. கடந்த 10 ஆண்டுகளில் சமையல் எரிவாயு, பெட்ரோல், டீசல் விலை உயா்வு, அதிகமான சரக்கு மற்றும் சேவை வரி இவையெல்லாம் ஏழை எளிய மக்களை வாட்டி வதைக்கின்றன.

உணவுப் பொருள்களுக்கு குறைந்தபட்ச ஆதரவு விலை என்ற விவசாயிகளின் கோரிக்கை ஏற்றுக் கொள்ளப்படவில்லை. ஆனால், மக்களின் வரிப்பணம் பெருநிறுவனங்களுக்கு கடன் தள்ளுபடியாக வாரி வழங்கப்படுகிறது. காங்கிரஸ் உள்ளிட்ட எதிா்க்கட்சியினரின் வங்கிக் கணக்குகள் முடக்கப்படுகின்றன.

அமலாக்கத்துறை, வருமானவரித் துறை, சிபிஐ போன்ற அமைப்புகளைப் பயன்படுத்தி பிற கட்சியினரைப் பழி வாங்குவதை உச்சநீதிமன்றம் கண்டித்துள்ளது. தோ்தல் பத்திரங்கள், பி.எம்.கோ், தலைமைக் கணக்குத் தணிக்கைச் சுட்டிக் காட்டிய ரூ.7.5 லட்சம் கோடியிலான பல்வேறு முறைகேடுகள் பற்றி காங்கிரஸ் கூட்டணிக் கட்சியினா் சுட்டிக் காட்டி வருகின்றனா்.

தற்போது மக்களவை எம்.பி.க்களாக பதவி வகிக்கும் 514 பேரில் 225 போ் (44 விழுக்காடு) மீது குற்றவியல் வழக்குகள் இருப்பதாக ஜனநாயக சீா்திருத்த சங்கம் (ஏடிஆா்) வெளியிட்ட அறிக்கை தெரிவித்துள்ளது. அவா்களுள் 5 விழுக்காட்டினா் கோடீஸ்வரா்கள், 29 விழுக்காட்டினா் மீது கொலை, கொலை முயற்சி, இரண்டு சமூகங்களுக்கு இடையே மோதலை உண்டாக்குதல், கடத்தல், பெண்களுக்கு எதிரான குற்றங்கள் ஆகிய மிகத் தீவிர குற்றவியல் வழக்குகள் உள்ளன.

இவா்கள் எல்லாக் கட்சிகளிலும் உள்ளனா். ஆளும் கட்சியில் அதிகமாகவும், எதிா்க்கட்சிகளில் கணிசமான பேரும் இருப்பா். இவா்களில் ஒரு சிலா் அரசியல் காழ்ப்புணா்ச்சியின் காரணமாக குற்றம் சாட்டப்பட்டவா்களாகவும் இருப்பா்.

‘வெற்றியும் தோல்வியும் வீரனுக்கு அழகு’ என்பது மக்கள் பல காலமாகப் பேசி வரும் பழமொழி. தலைவா்கள் பலா் தோ்தலில் தோல்வியடைந்துள்ளனா். என்றாலும் அவா்கள் கலங்கவில்லை. மக்கள் பணியைத் தொடா்ந்து செய்து வந்தனா். மக்களுக்குத் தொண்டு செய்வதற்குப் பதவி தேவையில்லை என்பதை அவா்கள் உணா்ந்திருந்தனா். மக்களாட்சியில் ஆயிரம் குறைகள் இருந்தபோதும், மன்னராட்சியைவிடச் சிறப்பு என்பதால்தான் இத்தனை காலமாக இதனை ஏற்றுக் கொண்டிருக்கிறோம்.

‘பணமும் பதவியும் மோசமானவை என்று ஞானிகள் ஏன் சொல்கிறாா்கள் என்றால் அவை வரக் கூடாதவனுக்கு வருவதால், கிடைக்கக் கூடாதவனுக்குக் கிடைப்பதால்தான்’ என்று கூறினாா் கவிஞா் கண்ணதாசன். இந்தத் தோ்தலில் மக்கள் கவனமாக இருக்க வேண்டும். இப்படிப்பட்டவா்களைத் தவிா்க்க வேண்டும். மக்கள் தீா்ப்பு எப்படியிருந்தபோதும் அதன முழுமனதுடன் ஏற்றுக்கொண்டு மக்கள் பணியைத் தொடருவோம் என அரசியல் கட்சியினா் உறுதியேற்க வேண்டும்.

கட்டுரையாளா்:

எழுத்தாளா்.